(អន្តរជាតិ)៖ អ្នកនាំពាក្យក្រសួងការបរទេសអាមេរិក បានបញ្ជាក់ថា ក្រសួងការបរទេសអាមេរិក កំពុងដាក់កម្រិតថ្មីលើទិដ្ឋាការធ្វើដំណើរទៅសហរដ្ឋអាមេរិក សម្រាប់សមាជិកនៃគណបក្សកុម្មុយនិស្តចិន។
យោងតាមច្បាប់ថ្មី ទិដ្ឋាការធ្វើដំណើររបស់សមាជិកបក្សកុម្មុយនិស្តចិន (CCP) និងសមាជិកគ្រួសារ គឺនឹងផ្លាស់ប្តូរភ្លាមៗពីអនុញ្ញាតឲ្យស្នាក់នៅ១០ឆ្នាំ បន្ថយមកត្រឹមឲ្យស្នាក់នៅត្រឹម១ខែ ហើយនឹងអនុញ្ញាតឲ្យចូលបានតែមួយលើក។
វិធានការថ្មីនេះ ធ្វើឡើងក្នុងរយៈពេលមិនដល់២ខែផង មុនពេលរដ្ឋបាលលោក ដូណាល់ ត្រាំ នឹងចាកចេញពីអំណាច ហើយជាវិធានការចុងក្រោយ ដែលបង្កភាពតានតឹងកាន់តែខ្លាំងឡើង រវាងទីក្រុងវ៉ាស៊ីនតោន និងទីក្រុងប៉េកាំង។
អ្នកនាំពាក្យក្រសួងការបរទេសដដែល បាននិយាយនៅក្នុងសេចក្តីថ្លែងការណ៍មួយ ផ្ញើទៅកាន់ទូរទស្សន៍ CNN ថា៖ «នេះជាគោលនយោបាយដែលយើងកំពុងបន្តអនុវត្តនៅទូទាំងសហរដ្ឋអាមេរិក ដើម្បីការពារប្រជាជាតិរបស់យើងពីឥទ្ធិពលអាក្រក់របស់បក្សកុម្មនិស្តចិន។ ក្រោមច្បាប់អន្តោប្រវេសន៍ និងសញ្ជាតិរបស់សហរដ្ឋអាមេរិក គឺក្រសួងការបរទេសមានសិទ្ធិអំណាចក្នុងការកំណត់ដែនកំណត់សុពលភាពទិដ្ឋាការរបស់ក្រុមនៃបុគ្គលដែលមានអរិភាព ធ្វើឲ្យខូចគុណតម្លៃរបស់សហរដ្ឋអាមេរិក»។
អស់រយៈពេលជាច្រើនទសវត្សរ៍ យើងបានអនុញ្ញាតឱ្យសមាជិកបក្សកុម្មយនិស្តចិន ចេញចូលធ្វើដំណើរដោយសេរី ទាំងការងារផ្លូវការ និងការទំនាក់ទំនងអាជីវកម្មនៅសហរដ្ឋអាមេរិក ខណៈដែលចិន មិនបានផ្តល់សិទ្ធិដោយសេរីដូចគ្នានេះ ដល់ពលរដ្ឋអាមេរិកនៅប្រទេសចិននោះទេ។ លើសពីនេះ ពួកគេបានចូលមកលួច បច្ចេកវិទ្យា និងគំរូអភិវឌ្ឍនប្រទេសពីលោកខាងលិច ទៅធ្វើនៅប្រទេសចិន។ អ្នកនាំពាក្យរូបនោះបានបន្តនិយាយថា វិធានការនេះ គឺដើម្បីបន្ថយឥទ្ធិពលលទ្ធិម៉ាក្សនិយម លេនីននិយម ដែលបង្កអរិភាពចំពោះពិភពលោកសេរី។
ក្រសួងការបរទេសអាមេរិក ក្រោមការដឹកនាំដោយលោករដ្ឋមន្ត្រី Mike Pompeo តែងបានចាត់វិធានការជាបន្តបន្ទាប់ប្រឆាំងនឹងរដ្ឋាភិបាលចិន ខណៈភាពតានតឹងរវាងអាមេរិកនិងចិន នៅតែបន្តកើនឡើង ឥតឈប់ឈរ៕
