(ភ្នំពេញ)៖ ចៅក្រមតុលាការសាលាដំបូងរាជធានីភ្នំពេញ បានកំណត់បើកសវនាការកាត់ទោសមនុស្ស ១៤០នាក់ នាព្រឹកថ្ងៃទី២៦វិច្ឆិកា ក្នុងសំណុំរឿង រួមគំនិតក្បត់ និងញុះញង់បង្កឱ្យមានភាពវឹកវរធ្ងន់ធ្ងរដល់សន្ដិសុខសង្គម។ អ្នកទាំងនោះ ជាប់ចោទ ពាក់ព័ន្ធនឹងការគាំទ្រនូវគម្រោងវិលត្រឡប់មកកាន់មាតុប្រទេសវិញ របស់លោក សម រង្ស៊ី កាលពីថ្ងៃ៩វិច្ឆិកា ឆ្នាំ២០១៩។
ក្នុងចំណោមជនជាប់ចោទទាំង ១៤០ នាក់នោះ មានកញ្ញា សេង ចាន់ធារី អតីតប្រធានមជ្ឈមណ្ឌលអភិវឌ្ឍន៍សង្គម ដែលបានប្រកាសថា នាងនឹងចូលរួមសវនាការ ហលើយទទួលស្គាល់ថា នាងពិតជាបានចូលរួមគាំទ្រគម្រោងវិលត្រឡប់របស់លោកសមរង្ស៊ី ទៅកាន់ប្រទេសកម្ពុជា កាលពីថ្ងៃទី៩ ខែវិច្ឆិកា តាមរយៈការលើកម្រាមដៃ៩ និងចូលរួមការជួបប្រជុំនានា ទាំងនៅក្នុងប្រទេសកម្ពុជា និងទាំងការជួបជុំ នៅប្រទេសន័រវេ។
នៅក្នុងសំណុំរឿងក្តីនេះ តុលាការសាលាដំបូងរាជធានីភ្នំពេញ បានបើកសវនាការកាត់ទោសលោក សម រង្ស៊ី និងអតីតថ្នាក់ដឹកនាំកំពូលៗរបស់អតីតគណបក្សប្រឆាំង ៨នាក់ទៀត កាលពីព្រឹកថ្ងៃទី២៥ ខែវិច្ឆិកា ឆ្នាំ២០២០នេះ។
ក៏ប៉ុន្តែចៅក្រមតុលាការសាលាដំបូងរាជធានីភ្នំពេញ បានសម្រេចលើកពេលសវនាការជាថ្មី ទៅធ្វើនៅថ្ងៃទី១៥ ខែធ្នូ ឆ្នាំ២០២០ បន្ទាប់ពីអវត្តមានមេធាវីជនជាប់ចោទទាំង ៩នាក់ គឺលោកមេធាវី សំ សុគង់។
កាលពីថ្ងៃទី១១ ខែវិច្ឆិកា តុលាការសាលាដំបូងរាជធានីភ្នំពេញ បានបើកសវនការលើសំណុំរឿងប្រឆាំងលោកសម រង្ស៊ី និងមន្ត្រីបក្សប្រឆាំង ៨នាក់ទៀត ពាក់ព័ន្ធនឹងបទ «ឧបឃាត» ឬ «ប៉ុនប៉ងធ្វើរដ្ឋប្រហារ»។ ប៉ុន្តែសវនាការកាលណោះ ត្រូវពន្យារពេល ដោយសារមេធាវី លើកឡើងថា ពុំមានពេលវេលាគ្រប់គ្រាន់សិក្សាស្រាវជ្រាវបន្ថែមលើសំណុំរឿងនេះ។
អតីតមេដឹកនាំបក្សប្រឆាំង ទាំង ៩នាក់នេះ សព្វថ្ងៃ កំពុងរស់នៅក្រៅប្រទេស។ អ្នកទាំង ៩នាក់នោះ ត្រូវបានចោទប្រកាន់ពីបទឧបឃាត ឬការប៉ុនប៉ងធ្វើរដ្ឋប្រហារ តាមរយៈការប្រកាសពីគម្រោងវិលត្រឡប់ពីក្រៅប្រទេស ចូលមកកាន់ប្រទេសកម្ពុជា កាលពីថ្ងៃទី៩ ខែវិច្ឆិកា ឆ្នាំ២០១៩។
កាលណោះ លោកសមរង្ស៊ី បានអំពាវនាវឲ្យអ្នកគាំទ្ររូបលោក នៅប្រទេសកម្ពុជា រួមទាំងពលករនៅប្រទេសថៃ ប្រទេសម៉ាឡេស៊ី និងប្រទេសកូរ៉េខាងត្បូង ជាដើម ធ្វើដំណើរជាមួយលោក ចូលមកកាន់ប្រទេសកម្ពុជាវិញ ដើម្បីផ្តួលរំលំរបបដឹកនាំរបស់សម្តេចនាយករដ្ឋមន្ត្រី ហ៊ុន សែន ដែលលោកសមរង្ស៊ី ចាត់ទុកថា ជាការដឹកនាំបែបផ្តាច់ការនៅកម្ពុជា៕
