(ភ្នំពេញ)៖ ក្រសួងសុខាភិបាល តាមរយៈលោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានចេញលិខិត ណែនាំដល់ឱសថការី ទទួលបន្ទុកបច្ចេកទេស និងប្រធានគ្រឹះស្ថានផលិតឱសថ ឱសថការីទទួលបន្ទុកបច្ចេកទេស និងប្រធានគ្រឹះស្ថានផលិតឧបករណ៍បរិក្ខារពេទ្យ ឱសថការីទទួលបន្ទុកបច្ចេកទេស និងប្រធានគ្រឹះស្ថានអាហរ័ណ នីហរ័ណឱសថ ប្រធានគ្រឹះស្ថានអាហរ័ណ នីហរ័ណផលិតផលគ្រឿងសម្អាង និងឱសថការីទទួលបន្ទុកបច្ចេកទេស និងម្ចាស់ឱសថស្ថាន ឱសថស្ថានរង ក្នុងកម្មវត្ថុ ថាត្រូវចែកចាយ ឬលក់ម៉ាស និងផលិតផលសម្លាប់មេរោគ ដែលមានគុណភាព និងសុវត្ថិភាព ឲ្យមានតម្លៃថោកសមរម្យ ដែលប្រជាពលរដ្ឋ អាចទិញប្រើប្រាស់បាន ក្នុងការការពារការចម្លងវីរុសកូវីដ១៩។
ក្នុងលិខិត លើកឡើងថា «ដើម្បីចូលរួមចំណែកបង្ការទប់ស្កាត់ការចម្លងវីរុសកូវីដ១៩ ពាក់ព័ន្ធទៅនឹង «ព្រឹត្តិការណ៍០៣វិច្ឆិកា» ក្រសួងសុខាភិបាល តម្រូវឲ្យលោកលោកស្រី ត្រូវចែកចាយ ឬលក់ម៉ាស និងផលិតផលសម្លាប់មេរោគ ដែលមានលេខទិដ្ឋាការ ឬបញ្ជិការ ឬប្រវេទន៍ ពីក្រសួងសុខាភិបាល ក្នុងតម្លៃថោកសមរម្យ ដើម្បីឲ្យប្រជាពលរដ្ឋ មានលទ្ធភាពទិញផលិតផលទាំងនេះ យកមកប្រើប្រាស់បាន និងហាមឃាត់ដាច់ខាតការចែកចាយ ឬលក់ផលិតផលម៉ាស និងផលិតផលសម្លាប់មេរោគក្លែងបន្លំ ឬអន់គុណភាព»។
ទន្ទឹមនេះដែរ ក្រសួងសុខាភិបាល ក៏បានជម្រាបជូនដល់សាធារណជន ជ្រាបថា «មុននឹងសម្រេចចិត្តទិញម៉ាស និងផលិតផលសម្លាប់មេរោគ ត្រូវពិនិត្យមើលផលិតផលណា ដែលមានបិទលតាបត្រទិដ្ឋាការ ឬបញ្ជិកា ឬប្រវេទន៍ ដូចមានគំរូភ្ជាប់មកជាមួយនៅទំព័រទី២ ទើបជាផលិតផល ដែលមានការទទួលស្គាល់ពីក្រសួងសុខាភិបាល»។
ក្រសួងសុខាភិបាល ក៏បានប្រកាសព្រមានថា ម្ចាស់គ្រឹះស្ថាន និងឱសថការី ទទួលបន្ទុកបច្ចេកទេសគ្រឹះស្ថានខាងលើ ឬបុគ្គលណា ដែលមិនគោរពតាមការណែនាំនេះ ក្រសួងសុខាភិបាល នឹងមានវិធានការតឹងរ៉ឹង ដោយធ្វើការផ្អាកសកម្មភាពអាជីវកម្មគ្រឹះស្ថាននោះ និងវិធានការផ្សេងៗទៀត ស្របតាមច្បាប់ជាធរមាន៕
