(ភ្នំពេញ)៖ ក្រសួងសុខាភិបាល បានប្រកាសនៅព្រឹកថ្ងៃទី១៤ ខែវិច្ឆិកានេះថា នៅកម្ពុជា មានអ្នកឆ្លងជំងឺកូវីដ១៩ថ្មី ម្នាក់ទៀត ជាបុរសជនជាតិអាមេរិកកាំង អាយុ ៦៥ឆ្នាំ។ បុរសអាមេរិកនេះ ទើបមកដល់កម្ពុជា កាលពីថ្ងៃទី១៣វិច្ឆិកា។ ក្រោយរកឃើញឆ្លងជំងឺកូវីដ១៩ អ្នកជំងឺនេះ ត្រូវបានដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ។
ក្រសួងសុខាភិបាល បានកត់សម្គាល់ថា អ្នកដំណើរតាមយន្តហោះ ជាមួយបុរសជនជាតិអាមេរិក ដែលរកឃើញកើតជំងឺកូវីដ១៩ ខាងលើនេះ សរុបមានចំនួន ៧១នាក់។ ក្នុងនោះ អ្នកដំណើរ ចំនួន ៧០នាក់ ដែលមានលទ្ធផលតេស្តអវិជ្ជមានវីរុសកូវីដ១៩ ត្រូវបានដាក់ឲ្យធ្វើចត្តាឡីស័ក ចំនួន ១៤ថ្ងៃ នៅមណ្ឌលទ័ពអាកាស ១៩នាក់ សណ្ឋាគារសុខា ភ្នំពេញ ៣នាក់ សណ្ឋាគារ ធានយី ៥នាក់ និងសណ្ឋាគារ ចុងស៊ីង ៤៤នាក់។
ក្រសួងសុខាភិបាល បានប្រកាសថា គិតត្រឹមម៉ោង ៧ព្រឹកថ្ងៃទី១៤ ខែវិច្ឆិកា ឆ្នាំ២០២០ នៅទូទាំងប្រទេស មានអ្នកឆ្លងជំងឺកូវីដ១៩ សរុបចំនួន ៣០២នាក់។ ក្នុងនោះ ២៨៩នាក់ ត្រូវបានព្យាបាលជាសះស្បើយ និង១៣នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ៕
