(សហរដ្ឋអាមេរិក)៖ ក្រុមសមាជិកនៃបក្សប្រជាធិបតេយ្យរបស់លោក ចូ បៃដិន បានស្នើដល់ក្រុមហ៊ុនបណ្តាញសង្គម Twitter ឲ្យបិទបណ្តោះអាសន្ននូវគណនីរបស់លោក ដូណាល់ ត្រាំ រហូតដល់ការរាប់សន្លឹកឆ្នោតចប់សព្វគ្រប់។

ប្រធានាធិបតី ដូណាល់ ត្រាំ បានសរសេរលើ Twitter កាលពីថ្ងៃពុធប្រកាសថា លោកបាននាំមុខគូប្រជែងរបស់លោក គឺ លោក ចូ បៃដិន នៃបក្សប្រជាធិបតេយ្យនៅរដ្ឋ Pennsylvania រដ្ឋ Georgia និងរដ្ឋ North Carolina ខណៈដែលការរាប់សន្លឹកឆ្នោតមិនទាន់ត្រូវបានបញ្ចប់នៅឡើយ។

ក្រុមបក្សប្រជាធិបតេយ្យចាត់ទុកថា នេះជាការប្រកាសដោយខ្លួនឯង បំពុលបំភ័នលទ្ធផលការបោះឆ្នោត នៅលើវេទិកាប្រព័ន្ធផ្សព្វផ្សាយសង្គម ហើយជា «ការផ្សព្វផ្សាយមិនពិត»។

រដ្ឋចំនួន៦ដែលមិនទាន់ចេញលទ្ធផលគឺរដ្ឋ Alaska, Arizona, Georgia, Nevada, North Carolina និងរដ្ឋ Pennsylvania។ ខណៈនេះ បាតុកម្មតវ៉ាបានកើតឡើងនៅសហរដ្ឋអាមេរិក ដែលម្ខាងប្រឆាំងការរាប់សន្លឹកបោះឆ្នោតដោយចាត់ទុកថាមានបន្លំ និងម្ខាងទៀតការពារសន្លឹកឆ្នោតខ្លួនហើយទាមទារឲ្យរាប់បន្ត៕