(វៀតណាម)៖ វៀតណាមកំពុងត្រៀមជម្លៀសប្រជាជនរហូតដល់ជិត ១.៣លាននាក់ ទៅកន្លែងមានសុវត្ថិភាព ស្របពេលដែលតាមការព្យាការណ៍ ព្យុះទីហ្វុង ម៉ូឡេវ (Molave) កំពុងឆ្ពោះមករកខ្លួន ក្រោយពីវាបានវាយប្រហារលើហ្វីលីពីន។ នេះបើយោងតាមការចុះផ្សាយរបស់ CNA នៅថ្ងៃទី២៦ ខែតុលា ឆ្នាំ២០២០។

Molave គឺជាព្យុះទីហ្វុងទី ១៧ហើយ ដែលបានវាយប្រហារលើប្រទេសហ្វីលីពីននៅឆ្នាំនេះ ហើយវាត្រូវគេរំពឹងថា នឹងបោកបក់មកដល់ ភាគកណ្តាលប្រទេសវៀតណាមនៅថ្ងៃពុធសប្តាហ៍នេះ ជាមួយល្បឿនខ្យល់ ១៣៥គីឡូម៉ែត្រក្នុងមួយម៉ោង។ Molave នឹងជាព្យុះទី ៤ ដែលបានវាយប្រហារលើវៀតណាម ក្នុងខែតុលានេះ។ មកទល់ឥឡូវនេះគ្រោះទឹកជំនន់ និងបាក់ដីបានសម្លាប់មនុស្ស ១៣០នាក់ និងធ្វើឲ្យបាត់ខ្លួន ២០នាក់នៅវៀតណាម៕

សូមបញ្ជាក់ជូនថា ព្យុះ Molave ​ទើបតែបានវាយប្រហារប្រទេសហ្វីលីពីនកាលពីថ្ងៃចន្ទកន្លងទៅនេះ ដោយព្យុះមួយនេះបានបង្កឲ្យមានខ្យល់បោកបក់ទៅលើដែនសមុទ្រហ្វីលីពីនក្នុងល្បឿន ១២៥ គីឡូម៉ែត្រ និងមានខ្យល់កន្ត្រាក់ក្នុងល្បឿន ១៥០ គីឡូម៉ែត្រក្នុងមួយម៉ោងផងដែរ។ ព្យុះ Molave គឺជាព្យុះទី ១៧ សម្រាប់ហ្វីលីពីននៅក្នុងឆ្នាំនេះ ហើយឥទ្ធពលរបស់ព្យុះមួយនេះបានធ្វើឲ្យអ្នកនេសាទលើសមុទ្រហ្វីលីពីនចំនួន ១២ នាក់បានបាត់ខ្លួន តែនៅមិនទាន់មានរបាយការណ៍អំពីអ្នកស្លាប់នៅឡើយទេ៕