(អន្តរជាតិ)៖ ក្រុមបាតុករនៅប្រទេសថៃ បានពង្រីកការតវ៉ារបស់ពួកគេជាលក្ខណៈអន្តរជាតិ ដោយដើរដង្ហែក្បួនទៅកាន់ស្ថានទូតអាល្លឺម៉ង់ ដើម្បីអំពាវនាវដល់រដ្ឋាភិបាលរបស់លោកស្រីអធិការបតី Angela Merkel ដើម្បីស៊ើបអង្កេត ពីការប្រើប្រាស់អំណាច របស់ព្រះមហាក្សត្រថៃ Maha Vajiralongkorn នៅពេលដែលទ្រង់កំពុងស្នាក់នៅក្នុងរដ្ឋ Bavaria ប្រទេសអាល្លឺម៉ង់។ នេះបើតាមការចេញផ្សាយរបស់ CNA នៅរសៀលថ្ងៃអង្គារ ទី២៧ ខែតុលា ឆ្នាំ២០២០។

ក្រុមអ្នកតវ៉ាបានធ្វើសកម្មភាព ខណៈពេលដែលសភាថៃបានចាប់ផ្តើមសម័យប្រជុំពិសេសរយៈពេល ០២ថ្ងៃចាប់តាំងពីព្រឹកថ្ងៃចន្ទម្សិលមិញ ដើម្បីដោះស្រាយភាពតានតឹងផ្នែកនយោបាយ ដែលបង្កឲ្យមានការតវ៉ាស្ទើរតែរាល់ថ្ងៃទាមទារឱ្យនាយករដ្ឋមន្រ្តីចុះចេញពីតំណែងការផ្លាស់ប្តូររដ្ឋធម្មនុញ្ញនិងការកែទម្រង់រាជាធិបតេយ្យ។

ក្រុមបាតុកររាប់ម៉ឺននាក់បានប្រមូលផ្តុំគ្នា និងដើរហែរក្បួនទៅកាន់ស្ថានទូតអាល្លឺម៉ង់ ប្រចាំទីក្រុងបាងកក។ សេចក្តីថ្លែងការណ៍មួយរបស់ក្រុមអ្នកតវ៉ាបានគូសបញ្ជាក់ថា ពួកគេដាក់លិខិតមួយទៅកាន់ស្ថានទូតអាល្លឺម៉ង់ ដើម្បីសាកសួរថា តើព្រះមហាក្សត្រថៃបានបំពានច្បាប់របស់អាល្លឺម៉ង់ ដោយប្រើអំណាចរបស់ទ្រង់ពីទីនោះដែរ ឬទេ ព្រោះសកម្មភាពបែបនេះ ជាអ្វីដែលរដ្ឋាភិបាលអាល្លឺម៉ង់ចាត់ទុកថា ជារឿងដែលមិនអាចទទួលយកបានផងដែរ។

រដ្ឋាភិបាលអាឡឺម៉ង់ បានលើកយកបញ្ហានេះរួចហើយកាលពីដើមខែតុលានៅពេលដែលរដ្ឋមន្រ្តីក្រសួងការបរទេស Heiko Maas បានឆ្លើយតបនឹងសំណួរខាងលើនៅក្នុងសភា ដោយបានសម្តែងការព្រួយបារម្ភ ចំពោះសកម្មភាពនយោបាយណាមួយ ដែលព្រះមហាក្សថៃអាចនឹងធ្វើឡើងនៅក្នុងប្រទេសអាល្លឺម៉ង់៕