(ភ្នំពេញ)៖ ក្រសួងសុខាភិបាល បានប្រកាសនៅព្រឹកថ្ងៃទី២០ ខែតុលា ឆ្នាំ២០២០ នេះថា មានអ្នកឆ្លងជំងឺកូវីដ១៩ ចំនួន ២នាក់ទៀត ជាប្តីប្រពន្ធជនជាតិខ្មែរ ទើបធ្វើដំណើរមកពីប្រទេសអ៊ីរ៉ាក់។
សេចក្តីប្រកាស បង្ហាញថា បុរសជនជាតិខ្មែរ អាយុ ៣៣ឆ្នាំ ( ជាស្វាមី ) និងស្ត្រីជនជាតិខ្មែរ អាយុ ៣២ឆ្នាំ ( ជាភរិយា និងមានកូនអាយុ ៣ឆ្នាំ ) មានអាសយដ្ឋាន ស្នាក់នៅភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ បានធ្វើដំណើរមកពីប្រទេសអ៊ីរ៉ាក់ ឆ្លងកាត់ទីក្រុងដូហា បន្តជើងហោះហើរ នៅប្រទេសកូរ៉េខាងត្បូង បានមកដល់កម្ពុជា នៅថ្ងៃទី១៨ ខែតុលា ឆ្នាំ២០២០។
ក្រសួងសុខាភិបាល បានប្រកាសថា លទ្ធផលធ្វើតេស្តវត្ថុសំណាករបស់បុគ្គលជាស្វាមី និងភរិយាទាំងពីរនាក់ខាងលើ គឺវិជ្ជមានវីរុសកូវីដ១៩ ដែលផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ ហើយបច្ចុប្បន្ន អ្នកជំងឺទាំងពីរនាក់នេះ ត្រូវបានដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ក្រសួងសុខាភិបាល បានកត់សម្គាល់ថា អ្នកដំណើរតាមយន្តហោះជាមួយអ្នកជំងឺខាងលើ សរុបមានចំនួន ១០៨នាក់ ( ស្ត្រី ៣៤នាក់ កុមារ ០៣នាក់ និងទារកម្នាក់ ) ដែលក្នុងចំនួននេះ មានបុរសជនជាតិខ្មែរ អាយុ ៣៣ឆ្នាំ និងស្ត្រីជនជាតិខ្មែរ អាយុ ៣២ឆ្នាំ ខាងលើ។ រីឯអ្នកដំណើរចំនួន ១០៦នាក់ ដែលមានលទ្ធផលតេស្តអវិជ្ជមាន វីរុសកូវីដ១៩នោះ ត្រូវបានដាក់ឲ្យធ្វើចត្តាឡីស័ក ចំនួន ១៤ថ្ងៃ នៅសណ្ឋាគារមួយ ក្នុងរាជធានីភ្នំពេញ ចំនួន ៥០នាក់ សណ្ឋាគារមួយទៀត ក្នុងរាជធានីភ្នំពេញ ចំនួន ១០នាក់ សណ្ឋាគារមួយទៀត ក្នុងរាជធានីភ្នំពេញ ចំនួន ២នាក់ សណ្ឋាគារមួយទៀត ក្នុងរាជធានីភ្នំពេញ ចំនួន ២នាក់ សណ្ឋាគារមួយទៀត ក្នុងរាជធានីភ្នំពេញ ចំនួន ៥នាក់ និងនៅមណ្ឌលកងទ័ពជើងអាកាស ចំនួន ៣៧នាក់។
ក្រសួងសុខាភិបាល បានប្រកាសថា គិតមកដល់ម៉ោង ៧ព្រឹក ថ្ងៃទី២០ ខែតុលា ឆ្នាំ២០២០ ស្ថានភាពជំងឺកូវីដ១៩ នៅកម្ពុជា គឺមានរកឃើញអ្នកឆ្លងជំងឺសរុប ២៨៥នាក់។ ក្នុងនោះ ២៨០នាក់ ត្រូវបានព្យាបាលជាសះស្បើយ និង ៥នាក់ កំពុងសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ ( បុរសជនជាតិឥណ្ឌូនេស៊ី ម្នាក់ បុរសជនជាតិខ្មែរ ២នាក់ ស្ត្រីជនជាតិខ្មែរ ម្នាក់ និងស្ត្រីជនជាតិបារាំង ម្នាក់ )៕
