(អន្តរជាតិ)៖ ទីភ្នាក់ងារសារព័ត៌មានចិនស៊ីនហួ បានផ្សាយថា ប្រធានាធិបតីចិន លោក ស៊ី ជីនពីង បានអំពាវនាវដល់កងទ័ពឱ្យបង្កើនការតាំងចិត្ត និងប្រមូលផ្ដុំថាមពល ដោយផ្ដោតលើការត្រៀមខ្លួនសម្រាប់សង្រ្គាម។ នេះបើតាមការដកស្រង់ព័ត៌មានពី CNN នៅថ្ងៃទី១៤ ខែតុលា ឆ្នាំ២០២០។

ការថ្លែងនេះត្រូវបានធ្វើឡើងបន្ទាប់ពី លោក ស៊ី បំពេញទស្សនកិច្ចទៅកាន់មូលដ្ឋានកងម៉ារីន នៃកងទ័ពរំដោះប្រជាជនចិនក្នុងទីក្រុង ឆាវចូវ ស្ថិតខេត្តក្វាងទុង នៃភាគខាងត្បូងប្រទេសចិន លោកក៏បានណែនាំឱ្យកងទ័ពចិនទាំងអស់ រក្សាស្ថានភាពប្រុងប្រយ័ត្នខ្ពស់ ភាពស្មោះត្រង់បរិសុទ្ធ និងគួរឱ្យទុកចិត្តបំផុត។

ខណៈដំណើរទស្សនកិច្ចយោធា បានកើតឡើងនៅពេលដែលភាពតានតឹងរវាងចិននិងសហរដ្ឋអាមេរិកនៅតែស្ថិតក្នុងកម្រិតខ្ពស់ ដោយមានការខ្វែងគំនិតគ្នាលើកោះតៃវ៉ាន់ និងជំងឺឆ្លងរាតត្បាតដែលបង្កឱ្យមានការបែកបាក់គ្នាយ៉ាងខ្លាំងរវាងទីក្រុងវ៉ាស៊ីនតោននិងប៉េកាំង៕