(អន្តរជាតិ)៖ មន្រ្តីសុខភាពរុស្ស៊ី បានឱ្យដឹងថារុស្សីនឹងចាប់ផ្តើមផ្ដល់វ៉ាក់សាំងប្រឆាំងជំងឺ COVID-19 ដែលត្រូវបានបង្កើតដោយមជ្ឈមណ្ឌលស្រាវជ្រាវជាតិ Gamaleya ឱ្យពលរដ្ឋខ្លួននៅដើមខែវិច្ឆិកាខាងមុខនេះ បើទោះបីជាមានការព្រួយបារម្ភរបស់អ្នកជំនាញមួយចំនួន អំពីសុវត្ថិភាពរបស់វ៉ាក់សាំងក៏ដោយ។ នេះបើយោងតាមការចុះផ្សាយរបស់ NHK នៅថ្ងៃទី២១ ខែតុលា ឆ្នាំ២០២០។

ប្រភពបានឱ្យដឹងថាវ៉ាក់សាំងនឹងត្រូវផ្តល់ឱ្យវេជ្ជបណ្ឌិត និងគ្រូបង្រៀន ហើយពលរដ្ឋឯទៀត នឹងទទួលបានវ៉ាក់សាំងជាបន្តបន្ទាប់ពីនោះ។

សូមរំលឹកឡើងថា រដ្ឋាភិបាលរុស្ស៊ីបានអនុម័តវ៉ាក់សាំងនេះកាលពីខែសីហា ហើយវាត្រូវបានគេដាក់ឈ្មោះថា «Sputnik V»។ បច្ចុប្បន្នមានមនុស្សប្រមាណ ៤ ម៉ឺននាក់ កំពុងចូលរួមក្នុងដំណើរការសាកល្បងទី៣ ឬដំណាក់កាលចុងក្រោយរបស់វ៉ាក់សាំងនេះ ខណៈក្រុមហ៊ុនក៏កំពុងពង្រីកការផលិត។

ស្របពេលប្រទេសរុស្ស៊ី មានការបេជ្តាចិត្តផ្តល់វ៉ាក់សាំងនេះដល់ប្រជាជាតិដទៃទៀតក្តី អ្នកជំនាញមួយចំនួននៅរុស្សីផ្ទាល់បានសម្ដែងការព្រួយបារម្ភ ហើយបាននិយាយថា មិនចាំបាច់ប្រញាប់ផលិតវាឡើងទាំងដែលមិនទាន់បញ្ចប់ការសាកល្បងនោះទេ៕