(សៀមរាប)៖ ក្រុមហ៊ុនវប្បធម៌កម្ពុជា ប្រកាសបិទអាជីវកម្មទាំងស្រុង ចាប់ពីថ្ងៃទី០៧ ខែវិច្ឆិកា ឆ្នាំ២០២០ខាងមុខនេះតទៅ ដោយសារតែការរីករាលដាលជំងឺ​កូវីដ-១៩ បានធ្វើឲ្យចំនួនភ្ញៀវមកចូលទស្សនា មានការថយចុះយ៉ាងគំហុកជាច្រើនខែកន្លងមកនេះ ដូច្នេះក្រុមហ៊ុនបានជួបការលំបាកផ្នែកសេដ្ឋកិច្ចនិងហិរញ្ញវត្ថុយ៉ាងខ្លាំង ពោលគឺក្រុមហ៊ុនមិនអាចផ្គត់ផ្គង់ លើការចំណាយនានា ជុំវិញដំណើរការអាជីវកម្ម បន្តទៀតបាននោះទេ។ នេះបើតាមលិខិតរបស់គណៈគ្រប់គ្រងភូមិវប្បធម៌កម្ពុជា ចុះថ្ងៃទី១១ ខែតុលា។

ក្នុងនោះ ក្រុមហ៊ុនវប្បធម៌កម្ពុជា បានបញ្ជាក់ថា ការបិទអាជីវកម្មនេះ នាំឲ្យមានការបញ្ចប់កិច្ចសន្យាការងារជាមួយបុគ្គលិកគ្រប់ផ្នែកទាំងអស់ ដូច្នេះគណៈគ្រប់​គ្រងនៃក្រុមហ៊ុនវប្បធម៌កម្ពុជា នឹងធ្វើការទូទាត់ប្រាក់សំណងជូនបុគ្គលិកទាំងអស់ស្របតាមបទប្បញ្ញត្ដិស្ដីពីការងារ៕