(ខេត្តបាត់ដំបង)៖ រដ្ឋបាលខេត្តបាត់ដំបង បានប្រកាសថា ស្ថានភាពទឹកជំនន់ នៅស្រុកសំពៅលូន និងផ្នែកមួយចំនួនធំ នៅស្រុកភ្នំព្រឹក មានសភាពធូរស្បើយច្រើន ដែលទឹកបានស្រកចុះ។ នេះដោយសារតែការធ្លាក់ភ្លៀង នៅផ្នែកខាងលើតិចតួច។
កាលពីព្រឹកថ្ងៃសៅរ៍ ទី១០ ខែតុលា ឆ្នាំ២០២០ លោក សឿម ប៊ុនរិទ្ធិ អភិបាលរង នៃគណៈអភិបាលខេត្តបាត់ដំបង បានអញ្ជើញត្រួតពិនិត្យស្ថានភាពទឹកជំនន់ ដែលបង្កឡើងដោយការធ្លាក់ភ្លៀងធ្ងន់ធ្ងរ តាមស្រុកបណ្ដោយព្រំដែន កម្ពុជា-ថៃ គឺស្រុកសំពៅលូន ស្រុកភ្នំព្រឹក និងស្រុកកំរៀង។
គួរបញ្ជាក់ថា ចំពោះស្ថានភាពទឹកជំនន់ នៅស្រុកសំពៅលូន និងផ្នែកមួយចំនួនធំ នៅស្រុកភ្នំព្រឹក មានសភាពធូរស្បើយច្រើន ដែលទឹកបានស្រកចុះ នេះដោយសារតែការធ្លាក់ភ្លៀងនៅផ្នែកខាងលើតិចតួច ដែលធ្វើឲ្យស្ថានភាពទឹកជំនន់បានធូរស្បើយ។ ដោយឡែក ចំពោះស្រុកកំរៀងវិញ ស្ថានភាពទឹកនៅមិនទាន់ធូរស្បើយនៅឡើយ ដែលនៅតែបន្តជន់លិចផ្ទះ ដំណាំ សត្វពាហនៈ បងប្អូនប្រជាពលរដ្ឋ។
ប្រជាពលរដ្ឋមួយចំនួន ដែលរស់នៅស្រុកកំរៀង បាននិយាយថា នេះជាគ្រោះទឹកជំនន់មួយ ដែលមិនធ្លាប់កើតមាននៅភូមិ ឃុំបងប្អូនច្រើនពីមុនមកទេ ភាគច្រើន គឺត្រឹមជន់ឡើងធម្មតា ដែលជាទម្លាប់នៃការធ្លាក់ភ្លៀងរដូវវស្សា ក៏ប៉ុន្តែសម្រាប់ឆ្នាំនេះ ភ្លៀងធ្លាក់បន្តឥតឈប់ឈរ ធ្វើឲ្យនាវូទឹកបានឡើងខ្ពស់ជាងឆ្នាំផ្សេងៗពីមុន ដោយសារតែការរងឥទ្ធិពលពីព្យុះនានា ដែលបោកបក់មកលើកម្ពុជាផងដែរ។
ប្រជាពលរដ្ឋ សង្ឃឹមថា អាកាសធាតុ នឹងល្អប្រសើរវិញ ក្នុងពេលដ៏ខ្លីខាងមុខនេះ ដើម្បីបានបងប្អូនប្រជាពលរដ្ឋ បានប្រកបមុខរបរដាំដំណាំបន្ត ដើម្បីចិញ្ចឹមជីវភាពរបស់គាត់។
គួរបញ្ជាក់ផងដែរថា រដ្ឋបាលខេត្តបាត់ដំបង នៅតែបន្តជួយសង្គ្រោះប្រជាពលរដ្ឋ ដែលជាប់គាំងនៅគេហដ្ឋាន ដោយសារទឹកជំនន់ ឲ្យមកកាន់ទីទួលមានសុវត្ថិភាព និងជាពិសេសព្យាយាមសង្គ្រោះជាជនចាស់ជរា ជនពិការ ស្ដ្រី និងកុមារតូចៗផងដែរ ហើយរដ្ឋបាលខេត្ត ដែលដឹកនាំដោយឯកឧត្តម ងួន រតនៈ អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាព បន្តព្យាយាមជួយសង្គ្រោះ និងដោះស្រាយជួយប្រជាពលរដ្ឋ ដែលរងគ្រោះដោយសារគ្រោះទឹកជំនន់នេះ៕
