(ភ្នំពេញ)៖ ក្រសួងសុខាភិបាល បានប្រកាសនៅព្រឹកថ្ងៃទី១១ ខែតុលានេះថា បុរសហុងគ្រី អាយុ ៧០ ឆ្នាំ នៅខេត្តសៀមរាប បានជាសះស្បើយពីជំងឺកូវីដ១៩ហើយ។ មកដល់ពេលនេះ មានអ្នកជាសះស្បើយពីជំងឺកូវីដ១៩ ចំនួន ២៧៨នាក់ និងកំពុងសម្រាកព្យាបាល នៅមន្ទីរពេទ្យ ៥នាក់។
ក្រសួងសុខាភិបាល បានប្រកាសថា បុរសជនជាតិហុងគ្រី អាយុ ៧០ឆ្នាំ មានអាសយដ្ឋាន នៅភូមិត្រូស សង្កាត់ស្វាយដង្គុំ ក្រុងសៀមរាប ខេត្តសៀមរាប ជាអ្នកធ្វើដំណើរមកពីប្រទេសបារាំង បានបន្តជើងហោះហើរ នៅប្រទេសកូរ៉េខាងត្បូង មកដល់កម្ពុជា នៅថ្ងៃទី១៣ ខែកញ្ញា ឆ្នាំ២០២០ ត្រូវបានព្យាបាលជាសះស្បើយ ដោយទទួលបបានលទ្ធផលតេស្តអវិជ្ជមានវីរុសកូវីដ១៩ ចំនួន ២ដង និងត្រូវបានអនុញ្ញាតឲ្យចេញពីមន្ទីរពេទ្យបង្អែក ខេត្តសៀមរាប។
ក្រសួងសុខាភិបាល បានប្រកាសថា គិតត្រឹមម៉ោង ៧ព្រឹក ថ្ងៃទី១១ ខែតុលា ឆ្នាំ២០២០ នៅទូទាំងប្រទេស មានអ្នកឆ្លងជំងឺកូវីដ១៩ សរុបចំនួន ២៨៣ នាក់។ ក្នុងនោះ ២៧៨នាក់ ត្រូវបានព្យាបាលជាសះស្បើយ និង ៥នាក់ កំពុងសម្រាកព្យាបាលនៅមន្ទីរពេទ្យរដ្ឋ ( មន្ទីរពេទ្យមិត្តភាពខ្មែរ-សូវៀត រាជធានីភ្នំពេញ ចំនួន ៤នាក់ ( ស្ត្រីជនជាតិឥណ្ឌា បុរសឥណ្ឌូនេស៊ី បុរសជនជាតិខ្មែរ និងស្ត្រីជនជាតិបារាំង ) និងមន្ទីរពេទ្យបង្អែកខេត្តសៀមរាប ចំនួន ម្នាក់ ( បុរសជនជាតិបារាំង )៕
