(ខេត្តពោធិ៍សាត់)៖ ជំនន់ទឹកភ្លៀង នៅខេត្តពោធិ៍សាត់ រហូតដល់ថ្ងៃទី១០ ខែតុលា ឆ្នាំ២០២០ បានលិចលង់តំបន់មួយចំនួន ក្នុងស្រុកវាលវែង ស្រុកភ្នំក្រវាញ ស្រុកបាកាន ក្រុងពោធិ៍សាត់ និងស្រុកកណ្តៀង។ ជំនន់ទឹកភ្លៀង ក៏បានលិចផ្លូវ លំនៅដ្ឋាន និងផ្ទះសម្បែងប្រជាពលរដ្ឋ ដែលរស់នៅតាមខ្នងប្រឡាយ មាត់ស្ទឹង និងជាយៗក្រុង។
រដ្ឋបាលខេត្តពោធិ៍សាត់ បានប្រើប្រាស់កម្លាំងសរុប និងមធ្យោបាយសរុប ដោយចលនាថ្នាក់ដឹកនាំគ្រប់លំដាប់ថ្នាក់ មន្ត្រីរាជការ កងកម្លាំងប្រដាប់អាវុធ និងប្អូនៗយុវជនគ្រប់អង្គភាព ចុះអន្ដរាគមន៍ ជួយទប់ទឹក និងជម្លៀសប្រជាពលរដ្ឋ ទៅទីទួលសុវត្ថិភាព និងនាំយកស្បៀង ទៅចែកជូនបងប្អូនប្រជាពលរដ្ឋ ដែលកំពុងលិចលង់។
លោក កែវ វ័យ ប្រធានមន្ទីរធនធានទឹក និងឧតុនិយម ខេត្តពោធិ៍សាត់ បានឲ្យដឹងថា មកដល់ថ្ងៃទី១០ ខែតុលា ឆ្នាំ២០២០ នេះ ជំនន់ទឹកភ្លៀង កំពុងជន់លិច នៅស្រុកភ្នំក្រវាញ លិចផ្លូវជាតិលេខ៥៥ ចំនួន០២កន្លែង ក្នុងឃុំសំរោង និងលិចទំនប់បង្ហៀរកាត់ស្ទឹងអារ៉ៃ ក្នុងឃុំរកាត មួយកន្លែងទៀត មិនអាចឱ្យអ្នកដំណើរឆ្លងកាត់បាននោះទេ។ នៅក្រុងពោធិ៍សាត់ ទឹកហៀរលើខឿនមាត់ស្ទឹង ខាងមុខសាលាខេត្ត ខាងមុខមន្ទីរពេទ្យ លិចផ្លូវគ្រួសក្រហម សាលារៀន និងផ្ទះសម្បែងប្រជាពលរដ្ឋមួយចំនួន ដែលរស់នៅតាមខ្នងប្រឡាយ មាត់ស្ទឹង និងជាយៗក្រុង។ ចំពោះស្រុកណ្ដៀង ទឹកហូរចូលសាលាបឋមសិក្សាពោធិ៍កំបោរ ហៀរលើផ្លូវគ្រប់ទីកន្លែង និងមានកាត់ផ្ដាច់ផ្លូវថ្នល់មួយចំនួនផងដែរ។ ចំណែកឯស្រុកវាលវែង មិនជាបញ្ហាប៉ុន្មាននោះទេ ដោយសារនៅតំបន់ភ្នំ ទឹកលិចផ្លូវតែពេលកំពុងភ្លៀងប៉ុណ្ណោះ លុះពីរបីម៉ោងក្រោយមក ទឹកហូរមកផ្នែកខាងក្រោមអស់ហើយ។
លោកប្រធានមន្ទីរ បន្តថា បើទោះបីកម្ពស់ទឹកស្ទឹងវាលវែង បានស្រកបណ្ដើរៗ ក៏ពិតមែន ពោលកម្ពស់ទឹកព្រឹកនេះ ៤ម៉ែត្រ (ប្រកាសអាសន្ន ១០ម៉ែត្រ) ក៏ប៉ុន្តែទឹកនៅតែបន្តហូរធ្លាក់តាមស្ទឹងក្រវាញ ដែលទឹកមានកម្ពស់ ៧.១៥ម៉ែត្រ (ប្រកាសអាសន្ន ៦ម៉ែត្រ) និងដាក់សម្ពាធខ្លាំងមកស្ទឹងពោធិ៍សាត់ ៥.៥២ម៉ែត្រ (ប្រកាសអាសន្ន ៥ម៉ែត្រ) ហើយធ្វើឱ្យប៉ពាល់ផ្ទះសម្បែង ដំណាំស្រូវ និងហេដ្ឋារចនាសម្ព័ន្ធមួយចំនួន របស់ប្រជាពលរដ្ឋ ក្នុងក្រុងពោធិ៍សាត់ និងស្រុកកណ្តៀងផងដែរ។
នៅខេត្តពោធិ៍សាត់ កាលពីថ្ងៃទី០៩ ខែតុលា ឆ្នាំ២០២០ ឯកឧត្តមទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម ព្រមទាំងឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល អមដំណើរដោយឯកឧត្តម ម៉ៅ ធនិន អភិបាលខេត្តពោធិ៍សាត់ និងថ្នាក់ដឹកនាំខេត្ត បានចុះពិនិត្យ និងដឹកនាំកម្លាំងប្រតិបត្តិការចម្រុះ ដោះស្រាយបញ្ហាជំនន់ទឹកភ្លៀង ព្រមទាំងបញ្ជាឱ្យក្រុមការងារបច្ចេកទេស សហការជាមួយបុគ្គលិកជំនាញក្រុមហ៊ុន Guangdong Foreign Construction បើកទ្វារទឹក៤ នៅសំណង់ស្ទាក់ទឹក ដំណាក់អំពិលទាំងយប់ ដើម្បីបន្ថយបរិមាណទឹកស្ទឹងពោធិ៍សាត់។ ទឹកស្ទឹងពោធិ៍សាត់ ហូរទៅផ្នែកខាងក្រោម តាមស្ទឹងស្វាយដូនកែវ ធ្លាក់ចូលទៅបឹងទន្លេសាប៕
