(ខេត្តកំពង់ឆ្នាំង)៖ ឯកឧត្តម អម សុភា អភិបាលរងកំពង់ឆ្នាំង និងជាប្រធានគម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (ឡាសិត២) ប្រចាំខេត្តកំពង់ឆ្នាំង បានដឹកនាំក្រុមការងារគម្រោង ចុះចែកពូជមាន់ដល់ក្រុមបណ្ដុំអាជីវកម្មផលិតមាន់ស្រែ ចំនួន ១០០០ក្បាល ស្នូកចំណី ស្នូកទឹក ៤០ និងចំណី ៦០០ គីឡូក្រាម នៅភូមិខ្សាច់ស ឃុំក្រាំងល្វា ស្រុកសាមគ្គឺមានជ័យ ខេត្តកំពង់ឆ្នាំង។
ក្នុងពិធី នៅថ្ងៃទី៨ ខែតុលា ឆ្នាំ២០២០ នេះ ឯកឧត្ដមអភិបាលរងខេត្ត បានមានប្រសាសន៍ថា ទោះក្នុងកាល:ទេស:ណាក៏ដោយ ក៏ប្រមុខរាជរដ្ឋាភិបាល តែងយកចិត្តទុកដាក់គិតគូសុខទុក្ខប្រជាជន បម្រើប្រជាជនដោយសហាការជាមួយអង្គការដៃគូដៃគូអភិវឌ្ឃន៍នានា ជាពិសេសធានាគារពិភពលោកដែលជាម្ចាស់ជំនួយដ៏ធំក្នុងការជួយពង្រឹងធនធានមនុស្ស ក្នុងការអភិវឌ្ឍសង្គម អោយកាន់តែប្រសើរឡើង ក៏ដូចជាការចូលរួមមចំណែកក្នុងការកាត់បន្ថយភាពក្រីក្រ នៅតាមជនបទ ដោយផ្ដល់ជាជំនាញ ឬរបរបន្ថែម សំដៅលើកកម្ពស់ជីវភាពរបស់ប្រជាពលរដ្ឋឲ្យមានប្រសើរជាងមុន។
បន្ថែមពីនោះ ឯកឧត្ដម អម សុភា អភិបាលរងខេត្ត ក៏បានសំណូមពរដល់ប្រជាពលរដ្ឋ ដែលទទួលបានកូនមាន់ ត្រូវខិតខំយកចិត្តទុកដាក់ ក្នុងការចិញ្ចឹម ដោយអនុវត្តតាមរបៀប បច្ចេកទេសថ្មី តាមរយ:ការផ្តល់បទពិសោធន៍របស់មន្ត្រីជំនាញ នៃមន្ទីរកសិកម្ម រុក្ខាប្រមាញ់ និងនេសាទខេត្ត ដែលបាន បណ្ដុះបណ្ដាល នាពេលកន្លងមក ធ្វើយ៉ាងណា ដើម្បីអោយការចិញ្ចឹមមាន់ទទួលបានជោគជ័យ ហើយអាចបន្ថែមប្រាក់ចំណូល ទ្រទ្រង់ជីវភាពកាន់តែធូរធារជាងមុន ពិសេសគឺអាចកាត់បន្ថយការចំណាកស្រុករបស់បងប្អូនប្រជាពលរដ្ឋទៀតផង។
ឯកឧត្តម ក៏បានអំពាវនាវឱ្យបងប្អូនប្រជាពលរដ្ឋ បន្តចូលរួមប្រយុទ្ធប្រឆាំងនឹងជំងឺកូវីដ១៩ ដោយអនុវត្តនូវវិធានការការពារតាមការណែនាំរបស់ក្រសួងសុខាភិបាល ព្រមទាំងបានអំពាវនាវដល់ប្រជាពលរដ្ឋ ដែលមិនទាន់បានទៅពិនិត្យ និងចុះឈ្មោះបោះឆ្នោត សូមអញ្ជើញទៅពិនិត្យ និងចុះឈ្មោះបោះឆ្នោត ឱ្យបានគ្រប់ៗគ្នា ដែលដំណើរការនេះ ចាប់ផ្ដើមពីថ្ងៃទី០១ ខែតុលា ឆ្នាំ២០២០ រហូតដល់ថ្ងៃទី១៩ ខែតុលា ឆ្នាំ២០២០ ជាកំហិត៕
