(ភ្នំពេញ)៖ កិច្ចប្រជុំពេញអង្គគណៈរដ្ឋមន្ត្រី ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានពិភាក្សា និងអនុម័តទាំងស្រុង លើ “ផែនការសកម្មភាពជាតិ ស្ដីពី ការទប់ស្កាត់អំពើហិង្សាលើស្ត្រី ២០១៩-២០២៣”។
ក្រសួងកិច្ចការនារី ក្រសួងសុខាភិបាល និងក្រសួងពាក់ព័ន្ធ ដោយមានកិច្ចសហការពីអង្គការសហប្រជាជាតិផងដែរ កំពុងរៀបចំសាកល្បងកន្លែងផ្ដល់សេវាចម្រុះ នៅមន្ទីរពេទ្យខេត្ត ចំនួន២ គឺខេត្តកំពង់ចាម និងខេត្តស្ទឹងត្រែង ដែលកន្លែងផ្ដល់សេវាចម្រុះនេះ នឹងផ្ដល់ភាពងាយស្រួល ក្នុងការសម្របសម្រួលផ្ដល់សេវាចាំបាច់ ជូនជនរងគ្រោះ ដោយអំពើហិង្សា ទាក់ទងនឹងយេនឌ័រ ដូចជា សេវាពិគ្រោះយោបល់ផ្លូវចិត្ត សេវាសុខភាព សេវាផ្នែកច្បាប់ សង្គមកិច្ច និងសេវាសំខាន់ៗមួយចំនួនទៀត ដែលឆ្លើយតបទៅនឹងតម្រូវការជនរងគ្រោះ ដើម្បីផ្ដល់កិច្ចការពារជួយជនរងគ្រោះ ប្រកបដោយប្រសិទ្ធភាព គុណភាព និងទាន់ពេលវេលា។
ចំណែកក្រុមប្រឹក្សាជាតិកម្ពុជា ដើម្បីស្ត្រី បានចុះកិច្ចព្រមព្រៀងជាមួយគណៈមេធាវីនៃព្រះរាជាណាចក្រកម្ពុជា ជាពិសេសក្រសួងកិច្ចការនារី ក៏បានសហការជាមួយក្រុមមេធាវីស្ម័គ្រចិត្តសម្ដេចតេជោ ហ៊ុន សែន ដែលមាននៅតាមរាជធានី ខេត្ត ទាំង ២៥ ក្នុងគោលបំណងបង្កើននូវលទ្ធភាពក្នុងការទទួលបានយុត្តិធម៌ សម្រាប់ស្ត្រី និងក្មេងស្រីក្រីក្រ ដែលរងគ្រោះដោយអំពើហិង្សាក្នុងគ្រួសារ។
មូលហេតុ និងភាពចាំបាច់ក្នុងកាធ្វើបច្ចុប្បន្នកម្ម ផែនការសកម្មភាពជាតិ ស្ដីពី ការទប់ស្កាត់អំពើហិង្សាលើស្ត្រី ២០១៤-២០១៨៖ ទន្ទឹមនឹងសមិទ្ធផល ដែលសម្រេចបានដ៏ត្រចេះត្រចង់ ដូចបានរាយការណ៍ជូនខាងលើ ក៏នៅមានបញ្ហាសេសសល់ និងបញ្ហាប្រឈមថ្មី ដែលបណ្ដាលមកពីការរីកចម្រើនយ៉ាងឆាប់រហ័សរបស់សង្គម ប្រព័ន្ធព័ត៌មានវិទ្យា និងសកលភាវូបនីយកម្ម។
ទម្រង់នៃអំពើហិង្សាលើស្ត្រី ដែលកើតឡើងភាគច្រើននៅកម្ពុជា គឺអំពើហិង្សាក្នុងគ្រួសារ ឬអំពើហិង្សាពីដៃគូស្និទ្ធស្នាល និងអំពើហិង្សាផ្លូវភេទ ដែលសកម្មភាពទាំងនោះ រួមមាន៖ ការប្រើប្រាស់ហិង្សា ការគំរាមកំហែង ការបង្ខិតបង្ខំ ឬការដកហូតសិទ្ធសេរីភាព ហើយបុព្វហេតុចម្បងនៃអំពើហិង្សាលើស្ត្រី ត្រូវបានទទួលស្គាល់ជាទូទៅថា បណ្ដាលមកពី “វិសមភាពយេនឌ័រ និងការរើសអើង” ក្នុងនោះ ក្រុមស្ត្រីងាយរងគ្រោះ មានហានិភ័យខ្ពស់ ក្នុងការទទួលរងនូវអំពើហិង្សា ដូចជា អំពើហិង្សាផ្លូវកាយ ការរំលោភបំពានផ្លូវភេទ និងការកេងប្រវ័ញ្ចជាដើម។
អំពើហិង្សាលើស្ត្រី គឺជាឧបសគ្គដ៏ចម្បង ដែលរារាំងដល់ការចូលរួមរបស់ស្ត្រីក្នុងកិច្ចអភិវឌ្ឍជាតិ និងជាការដាក់បន្ទុកយ៉ាងធ្ងន់ធ្ងរដល់សេដ្ឋកិច្ចជាតិ និងសង្គមផងដែរ ដោយរដ្ឋបាលខាតបង់ថវិកាលើការចំណាយ សម្រាប់សេវាសុខភាព ការបាត់បង់ផលិតភាព ជម្រកសុវត្ថិភាពសម្រាប់ស្ត្រីរងគ្រោះ និងកូនៗ សេវាសង្គមកិច្ច ដើម្បីស្ដារនីតិសម្បទាស្ត្រីរងគ្រោះ សេវាច្បាប់ និងសេវាគាំទ្រចាំបាច់មួយចំនួនទៀត។
សេចក្ដីព្រាងផែនការសកម្មភាពជាតិ ស្ដីពី ការទប់ស្កាត់អំពើហិង្សាលើស្ត្រីឆ្នាំ២០១៩-២០២៣ ត្រូវបានអភិវឌ្ឍឡើងស្របតាមយុទ្ធសាស្ត្រចតុកោណដំណាក់កាលទី៤ (ដើម្បីកំណើនការងារ សមធម៌ និងប្រសិទ្ធភាពដែលមានចំណងជើង “កសាងមូលដ្ឋានឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០” ផែនការយុទ្ធសាស្ត្រអភិវឌ្ឍន៍ជាតិ ឆ្នាំ២០១៩-២០២៣ និងគោលដៅអភិវឌ្ឍប្រកបដោយចីរភាពរបស់កម្ពុជា នៅក្នុងគោលដៅទី៥ ស្ដីពី “សម្រេចឱ្យបានសមភាពយេនឌ័រ និងពង្រឹងភាពអង់អាចរបស់ស្ត្រី និងកុមារគ្រប់រូប”។
សេចក្ដដីព្រាងផែនការសកម្មភាពជាតិ ស្ដីពី ការទប់ស្កាត់អំពើហិង្សាលើស្ត្រី ២០១៩-២០២៣ បានដាក់ចេញនូវយុទ្ធសាស្ត្រ ចំនួន ៤ រួមមាន៖ យុទ្ធសាស្ត្រទី១៖ការបង្ការទប់ស្កាត់ យុទ្ធសាស្ត្រទី២៖ កិច្ចការពារផ្លូវច្បាប់ និងសេវាពហុវិស័យ យុទ្ធសាស្ត្រទី៣៖ ច្បាប់ និងគោលនយោបាយ
យុទ្ធសាស្ត្រទី៤៖ ការតាមដានត្រួតពិនិត្យ និងការវាយតម្លៃ។ ផែនការសកម្មភាពជាតិ លើកទី៣ ជាផែនទីតម្រង់ទិសសម្រាប់ក្រសួង ស្ថាប័ន អ្នកពាក់ព័ន្ធទាំងនៅថ្នាក់ជាតិ និងថ្នាក់ក្រោមជាតិ អង្គការសង្គមស៊ីវិល វិស័យឯកជន និងប្រព័ន្ធផ្សព្វផ្សាយក្នុងការអនុវត្តការងារបង្ការទប់ស្កាត់ ឆ្លើយតប និងដោះស្រាយអមពើហិង្សាលើស្ត្រី និងក្មេងស្រីឱ្យកាន់តែមានប្រសិទ្ធភាព និងភាពស័ក្តិសិទ្ធខ្ពស់ ក្នុងគោលបំណងឆ្ពោះទៅកាត់បន្ថយទម្រង់នៃអំពើហិង្សាលើស្ត្រី និងក្មេងស្រី ដើម្បីលើកកម្ពស់សមធម៌ និងបរិយាបន្នសង្គម ស្របនឹងទិសស្លោកនៃគោលដៅអភិវឌ្ឍប្រកបដោយចីរភាព “មិនទុកនរណាម្នាក់ចោល”។
ដើម្បីអនុវត្តផែនការសកម្មភាពជាតិ ស្ដីពី ការទប់ស្កាត់អំពើហិង្សាលើស្ត្រី ២០១៩-២០២៣ ឱ្យទទួលបានជោគជ័យតាមការរំពឹងទុក ទាមទារឱ្យមានកិច្ចសហការ និងការប្ដេជ្ញាចិត្តរួមគ្នារវាងក្រសួង ស្ថាប័នជំនាញ និងអ្នកពាក់ព័ន្ធទាំងអស់ សំដៅប្រែក្លាយផែនការសកម្មភាពនេះ ឱ្យក្លាយទៅជាការអនុវត្តជាក់ស្ដែងទៅតាមវិស័យនីមួយៗ ដើម្បីរួមគ្នាបង្ការទប់ស្កាត់ ឆ្លើយតប ផ្ដល់កិច្ចអន្តរាគមន៍ និងកិច្ចការពារជូនជនរងគ្រោះឱ្យបានទាន់ពេលវេលា និងមានប្រសិទ្ធភាពខ្ពស់៕
