(ភ្នំពេញ)៖ សម្តេចតេជោ ហ៊ុន សែន បានប្រកាសថា លោក ឆែម សាវុធ ភរិយា និងក្រុមគ្រួសាររបស់គាត់ គឺជាជនរងគ្រោះ ហើយក៏ជាភ័ព្វសំណាង ដែលយើងបានទទួលព័ត៌មានពិតប្រាកដពីករណីឆ្លងជំងឺកូវីដ១៩។ ដូច្នេះលោក ឆែម សាវុធ និងក្រុមគ្រួសារ មិនមានកំហុសទេ តែកូវីដទេ ដែលជាអ្នកខុស។ ការលើកឡើងថា លោក ឆែម សាវុធ ត្រូវដាក់ឲ្យចូលនិវត្តនោះ គឺមិនត្រូវទេ។
សូមរម្លឹកថា ព្រឹត្តិការណ៍សហគមន៍២៨វិច្ឆិកា ឆ្លងមុនគេ គឺក្រុមគ្រួសាររបស់លោក ឆែម សាវុធ អគ្គនាយកពន្ធនាគារ។ គិតមកដល់ថ្ងៃទី១៥ ខែធ្នូនេះ ព្រឹត្តិការណ៍សហគមន៍២៨វិច្ឆិកា មានអ្នកឆ្លងសរុប ៤១នាក់ និងមានអ្នកពាក់ព័ន្ធដល់ទៅជាង ១៨០០០នាក់។ ក្នុងនោះ ក៏មាន ៣នាក់ ត្រូវបានព្យាបាលជាសះស្បើយ ដែលមានលោក ឆែម សាវុធ ជាសះស្បើយ មុនគេ ហើយត្រូវបានអនុញ្ញាតឲ្យចាកចេញពីមន្ទីរពេទ្យហើយ កាលពីថ្ងៃទី១៤ ខែធ្នូ។
សម្តេចតេជោ ហ៊ុន សែន បានប្រកាសថា ព្រឹត្តិការណ៍សហគមន៍២៨វិច្ឆិកា ត្រូវបានគ្រប់គ្រងបានហើយ តែមិនទាន់បញ្ចប់នៅឡើយទេ។ សម្តេចតេជោ ប្រកាសដូច្នេះ ដោយសំអាងលើហេតុផល ៥យ៉ាង ដូចជា មុនថ្ងៃរកឃើញកូវីដ តើអ្នកជំងឺបានទៅកន្លែងណាខ្លះ? ព្រោះកន្លងមក យើងរកឃើញតែ ២ហាង និងគ្រួសារលោកឆែមសាវុធ ដែលមានការឆ្លងខ្លាំង។
