(ភ្នំពេញ)៖ រដ្ឋមន្ត្រីក្រសួងមុខងារសាធារណៈ ឯកឧត្តម ព្រុំ សុខា បានចេញលិខិត ជម្រាបជូនឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រីគ្រប់ក្រសួង ស្ថាប័ន អភិបាលរាជធានីខេត្ត អភិបាលក្រុងស្រុកខណ្ឌ ស្តីពី ការធ្វើប្រក្រតីភាពការផ្ទេរក្របខណ្ឌ ឬផ្លាស់ប្តូរកន្លែងធ្វើការរបស់មន្ត្រីរាជការនៅថ្នាក់ក្រោមជាតិឡើងវិញ។
ក្រសួងមុខងារសាធារណៈ បានចេញលិខិត ចុះថ្ងៃទី២៧ ខែធ្នូ ឆ្នាំ២០១៩ ស្តីពី ការផ្អាកការផ្ទេរក្របខណ្ឌ ឬផ្លាស់ប្តូរកន្លែងធ្វើការរបស់មន្ត្រីរាជការ នៅថ្នាក់ក្រោមជាតិ ក្នុងពេលកំពុងដំណើរការនៃការរៀបចំផ្ទេររចនាសម្ព័ន្ធ និងបុគ្គលិកឲ្យស្ថិតក្រោមការគ្រប់គ្រងរបស់រដ្ឋបាលថ្នាក់ក្រោមជាតិ។
ក្នុងលិខិត លោករដ្ឋមន្ត្រី ព្រុំ សុខា បានបញ្ជាក់ថា ដោយផ្អែកលើតម្រូវការ និងសំណូមពរការងារចាំបាច់របស់ក្រសួង ស្ថាប័ន និងរដ្ឋបាលរាជធានី ខេត្ត ក្រុង ស្រុក ខណ្ឌ ក្រសួងមុខងារសាធារណៈ សូមធ្វើការណែនាំពីការធ្វើប្រក្រតីភាពឡើងវិញ លើការផ្ទេរក្របខណ្ឌ ឬផ្លាស់ប្តូរកន្លែងធ្វើការរបស់មន្ត្រីរាជការ ដូចខាងក្រោម៖ ១-អនុញ្ញាតឲ្យធ្វើប្រក្រតីភាពឡើងវិញ ចំពោះការផ្ទេរក្របខណ្ឌ ឬផ្លាស់ប្តូរកន្លែងធ្វើការរបស់មន្ត្រីរាជការ ដែលបម្រើការងារ នៅតាមក្រសួង ស្ថាប័នថ្នាក់ជាតិ មន្ត្រីរាជការនៃមន្ទីរអង្គភាពជំនាញនានា ដែលបំពេញការងារនៅថ្នាក់ក្រោមជាតិ។ ២-អនុញ្ញាតឲ្យធ្វើប្រក្រតីភាពឡើងវិញ ចំពោះការផ្ទេរក្របខណ្ឌ ឬផ្លាស់ប្តូរកន្លែងធ្វើការរបស់មន្ត្រីរាជការ ដែលបម្រើការាងរនៅរដ្ឋបាលរាជធានីខេត្ត។ ៣-ផ្អាកការផ្ទេរចេញពីរចនាសម្ព័ន្ធរដ្ឋបាលក្រុង ស្រុក ខណ្ឌ ទៅមន្ទីរ អង្គភាពរបស់ក្រសួង ស្ថាប័ន ឬរដ្ឋបាលថ្នាក់ជាតិ រហូតដល់មានការសម្រេចជាថ្មី។ ក៏ប៉ុន្តែរដ្ឋបាលក្រុង ស្រុក ខណ្ឌ អាចធ្វើការផ្លាស់ប្តូរកន្លែងធ្វើការរបស់មន្ត្រីរាជការរវាងអង្គភាពមួយ ទៅអង្គភាពមួយទៀត ព្រមទាំងការតែងតាំង ឬប្រគល់ភារកិច្ចមន្ត្រីរាជការ នៅក្នុងរចនាសម្ព័ន្ធរដ្ឋបាលក្រុង ស្រុក ខណ្ឌសាមី ដោយអនុលោមតាមគោលការណ៍ បែបបទ និងនីតិវិធី ដែលបានកំណត់ក្នុងលិខិតបទដ្ឋានគតិយុត្ត ដែលនៅជាធរមាន៕
