(ភ្នំពេញ)៖ ក្រសួងសុខាភិបាល នៅព្រឹកថ្ងៃទី១២ ខែធ្នូនេះ បានប្រកាសថា មិនមានអ្នកឆ្លងជំងឺកូវីដ១៩ថ្មីទេ។ គិតមកដល់ព្រឹកថ្ងៃទី១២ ខែធ្នូនេះ អ្នកជំងឺកូវីដ១៩ ដែលបានរកឃើញពាក់ព័ន្ធព្រឹត្តិការណ៍សហគមន៍២៨វិច្ឆិកា មានចំនួន ៤០នាក់ដដែល។
ក្រសួងសុខាភិបាល ក៏បានប្រកាសឲ្យអ្នកដែលពាក់ព័ន្ធទៅនឹងព្រឹត្តិការណ៍សហគមន៍២៨វិច្ឆិកា ទាំងអស់ ទៅធ្វើតេស្តដោយយកវត្ថុសំណាក លើកទី៣ ដែលប្រព្រឹត្តទៅ នៅថ្ងៃទី១២ ខែធ្នូ ឆ្នាំ២០២០ នៅតាមទីតាំង ដូចខាងក្រោម៖ ១.បរិវេណក្រសួងមហាផ្ទៃ ( សម្រាប់បុគ្គលិក-មន្ត្រីរាជការ ) ពីម៉ោង ៨ព្រឹក ២.បរិវេណពហុកីឡដ្ឋានជាតិអូឡាំពិក ( សម្រាប់ប្រជាពលរដ្ឋ ដែលបានពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកា ) ពីម៉ោង ៧ព្រឹក និងដោយឡែកសម្រាប់អ្នកប៉ះពាល់ទៅនឹងព្រឹត្តិការណ៍សហគមន៍ ២៨វិច្ឆិកា នៅតាមបណ្តាខេត្ត សូមអញ្ជើញទៅធ្វើតេស្ត ជាលើកទី៣ នៅតាមមន្ទីរសុខាភិបាលខេត្ត ដែលទទួលខុសត្រូវ ក្នុងការរៀបចំទីកន្លែងធ្វើតេស្ត វត្ថុសំណាក នៅពេលនោះ សម្រាប់អ្នកពាក់ព័ន្ធនៅតាមខេត្ត។
គិតត្រឹមម៉ោង ៧ព្រឹកថ្ងៃទី១២ ខែធ្នូ ឆ្នាំ២០២០ ក្រសួងសុខាភិបាល ប្រកាសថា នៅទូទាំងប្រទេស មានអ្នកឆ្លងសរុប ៣៥៧នាក់។ ក្នុងនោះ បានជាសះស្បើយ ៣០៧នាក់ និង ៥០នាក់ កំពុងសម្រាកព្យាបាល នៅមន្ទីរពេទ្យរដ្ឋ។
ក៏ប៉ុន្តែក្រសួងសុខាភិបាល បានបញ្ជូនអ្នកជំងឺកូវីដ១៩ ចំនួន ៥នាក់ ពីមន្ទីរពេទ្យមិត្តភាពខ្មែរ-សូវៀត ឲ្យទៅសម្រាកព្យាបាល នៅមជ្ឈមណ្ឌលជាតិប្រយុទ្ធនឹងជំងឺរបេង និងហង់សិន កាលពីថ្ងៃទី១១ ខែធ្នូ ឆ្នាំ២០២០៕
