(ភ្នំពេញ)៖ ក្រសួងសុខាភិបាល នៅយប់ថ្ងៃទី៤ ខែធ្នូ ឆ្នាំ២០២០នេះ បានសេចក្ដីប្រកាសព័ត៌មានមួយស្ដីពី ការ​អនុវត្តវិធានការសុខាភិបាល និងការធ្វើចត្តាឡីស័កចំពោះអ្នកដំណើរទាំងអស់ចូលមកប្រទេសកម្ពុជា ដោយចាប់​អនុវត្តពីថ្ងៃទី១២ ខែធ្នូ ឆ្នាំ២០២០តទៅ។ ក្នុងសេចក្ដីប្រកាសដដែលនេះ ក៏បានបញ្ជាក់ដែរ ថា​ ក្រសួងសុខាភិបាល នឹងបង្ហាញអត្តសញ្ញាណអ្នកជំងឺកូវីដ-១៩ បន្ទាប់ពីទទួលបានលទ្ធផលតេស្តកូវីដ-១៩វិជ្ជមានភ្លាម តាមបណ្ដាញ​ផ្សព្វ​ផ្សាយផ្លូវការរបស់ក្រសួងសុខាភិបាល ដើម្បីងាយស្រួលក្នុងការស្វែ​ងរកអ្នកពាក់ព័ន្ធឲ្យបានឆាប់រហ័ស ដើម្បី​បង្ក​លក្ខណៈងាយស្រួលឲ្យអ្នកពាក់ព័ន្ធនឹងជំងឺកូវីដ-១៩ ចេញមុខទាក់ទងមកក្រសួងសុខាភិបាល ឬអាជ្ញាធរពាក់​ព័ន្ធ៕