(ភ្នំពេញ)៖ ផ្សារអ៊ីអន១ ស្ថិតនៅមាត់ទន្លេ ក្នុងរាជធានីភ្នំពេញ ត្រូវរាជរដ្ឋាភិបាលកម្ពុជា សម្រេច​បិទជាបណ្តោះអាសន្ន នៅយប់ថ្ងៃទី២៨ ខែវិច្ឆិកា ឆ្នាំ២០២០ បន្ទាប់ពីរកឃើញស្ត្រីខ្មែរម្នាក់ កើតជំងឺ​កូវីដ១៩។ ស្ត្រីរូបនោះ បានចូលទៅផ្សារអ៊ីអន ​ដើម្បីញ៉ាំអាហារ និងទិញអីវ៉ាន់មួយ​ចំនួន។ នេះបើតាមលោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល។

លោកជំទាវ យក់ សម្បត្តិ បាន​ប្រាប់ Fresh News នៅ​យប់ថ្ងៃទី២៨ ខែវិច្ឆិកានេះ​ថា ស្រ្តីខ្មែររូបនេះ ត្រូវបានធ្វើតេស្តឃើញថា មានវិជ្ជមានមេរោគកូវីដ១៩ នៅល្ងាចថ្ងៃទី២៨ ខែវិច្ឆិកា ឆ្នាំ២០២០នេះ បន្ទាប់ពីរូបគាត់ ចេញរោគសញ្ញាសង្ស័យ ហើយភ្លាមៗនេះ ក្រសួងសុខាភិបាល ក៏បាន និងកំពុងស្វែងរកអ្នកពាក់ព័ន្ធជាមួយគាត់ នៅក្នុងផ្សារអ៊ីអន១ ដើម្បីយកមកធ្វើតេស្ត និងធ្វើចត្តា​ឡីស័កផងដែរ។

លោកជំទាវ​ យក់ សម្បត្តិ បានបញ្ជាក់ថា ការសម្រេចបិទផ្សារអ៊ីអន១ រយៈពេលប៉ុន្មានថ្ងៃសិន ដើម្បីតាមដានរកអ្នកពាក់ព័ន្ធមកធ្វើតេស្ត និងទប់ស្កាត់ការចម្លងមេរោគកូវីដ១៩ បន្តទៀត។

លោកជំទាវ យក់ សម្បត្តិ មិនបានប្រាប់លម្អិតពីដំណើរ​ដើមទង ដែលស្ត្រីនេះ ឆ្លងមេរោគកូវីដ១៩ទេ គ្រាន់តែលោកជំទាវ បន្ថែមថា​ ស្រ្តីដែលមានផ្ទុកមេរោគកូវីដខាងលើនេះ រស់នៅក្នុងបុរីប៉េងហួត ផ្លូវ៦០ម៉ែត្រ ក្នុងរាជធានីភ្នំពេញ៕