(ភ្នំពេញ)៖ អ្នកនាំពាក្យក្រសួងសុខាភិបាល លោកជំទាវ ឱ វណ្ណឌីន បានផ្សព្វផ្សាយនូវរបាយការណ៍ ស្តីពី ករណីសង្ស័យពុលទឹក ដែលមានសារធាតុគីមីពុល នៅភូមិជីប្រ៉ង ឃុំជៀប ស្រុកទឹកផុស ខេត្តកំពង់ឆ្នាំង សរុបជនរងគ្រោះ ចំនួន ១៣នាក់ ( ស្រី ៨នាក់ និងប្រុស ៥នាក់ ) ដែលមានអាយុពី ៤ឆ្នាំ ដល់ ៥៣ឆ្នាំ។ ហេតុការណ៍នេះ បណ្តាលឲ្យស្លាប់ ចំនួន ២នាក់ ( ស្រីទាំងពីរនាក់ ) និងអ្នកសម្រាកព្យាបាល ដោយសង្គ្រោះបន្ទាន់ នៅមន្ទីរពេទ្យខេត្តកំពង់ឆ្នាំង ចំនួន ១០នាក់ ក្នុងនោះ មានបុរស ម្នាក់ មានសភាពធ្ងន់។
របាយការណ៍ពីមន្ទីរសុខាភិបាល ខេត្តកំពង់ឆ្នាំង បង្ហាញថា តាមការសាកសួរអ្នកភូមិជីប្រ៉ង ទាំងចាស់ និងក្មេង បានទៅច្រូតស្រូវ នៅព្រៃអូរគគីរ ឃុំជៀប ចាប់ពីថ្ងៃទី២៣ ខែវិច្ឆិកា ឆ្នាំ២០២០ រហូតដល់ថ្ងៃ២៥ ខែវិច្ឆិកា ឆ្នាំ២០២០។ ពេលព្រឹកថ្ងៃទី២៤ ប្រហែលម៉ោង ១១ថ្ងៃត្រង់ ពួកគាត់បានអស់ទឹក សម្រាប់បរិភោគ ក៏បានទៅដងទឹកអណ្តូង ដែលគេជីក នៅតាមវាលស្រែ យកទឹក សម្រាប់ប្រើប្រាស់ និងយកមកចែកគ្នាបរិភោគពេលបាយថ្ងៃត្រង់។
មន្ទីរសុខាភិបាល បានគូសបញ្ជាក់ថា ពេលព្រឹកថ្ងៃទី២៤ ខែវិច្ឆិកានោះ មានគេឃើញកសិករដាំឪឡឹកក្បែរនោះ បានយកធុងថ្នាំលាយ និងលាងធុងថ្នាំនៅទីនោះ មុន និងក្រោយបាញ់ថ្នាំឪឡឹករបស់គាត់។
របាយការណ៍ បន្ថែមថា ក្រោយពីពិសារទឹកនោះ បន្តិចមក មានស្ត្រីម្នាក់ ចេញសញ្ញាក្អួតចង្អោរ តែមិនមានអ្នកចាប់អារម្មណ៍ថា ពុលថ្នាំ ស្មានថា ខ្យល់ចាប់ និងជាបន្តបន្ទាប់ មានអ្នកអស់កម្លាំង ឈឺក្បាល ទន់ដៃជើង ពិបាកដកដង្ហើម និងមានរហូតដល់ស្លាប់ ២នាក់ ហើយអ្នកធ្ងន់ម្នាក់ ត្រូវបានបញ្ជូនទៅសម្រាកព្យាបាលនៅមន្ទីរពេទ្យខេត្តកំពង់ឆ្នាំង និងតាមដានជាបន្ត ១០នាក់ផ្សេងទៀត នៅថ្ងៃនោះ ភ្លាមៗ។
មន្ទីរសុខាភិបាល បន្ថែមថា បច្ចប្បន្ន ស្ថានភាពអ្នកពុលទាំង ១០នាក់ មានសភាព បានធូរស្រាល និងបានចេញត្រឡប់ទៅផ្ទះសម្បែងរៀងៗខ្លួន នៅថ្ងៃទី២៧ នេះរួចហើយ។ តែស្ត្រីម្នាក់ អាយុ ៥៣ឆ្នាំ ក៏បានធូរស្បើយពីការពុលនេះហើយ តែត្រូវនៅបន្តព្យាបាល ដោយសារគាត់មានជំងឺសួត ដែលក្រុមគ្រូពេទ្យ បានពិនិត្យឃើញ៕
