(ភ្នំពេញ)៖ ដូចការគ្រោងទុក នៅព្រឹកថ្ងៃទី២៦ ខែវិច្ឆិកានេះ ចៅក្រមតុលាការសាលាដំបូងរាជធានីភ្នំពេញ បានបើកសវនាការ ជំនុំជម្រះលើសំណុំរឿង «៩វិច្ឆិកា» ពាក់ព័ន្ធនឹងអ្នកគាំទ្រទណ្ឌិត សម រង្ស៊ី ដែលមានផែនការប៉ុនប៉ងធ្វើរដ្ឋប្រហារ ផ្តួលរំលំរាជរដ្ឋាភិបាលស្របច្បាប់។ ក៏ប៉ុន្តែបន្ទាប់ពីបើកសវនាការអស់រយៈពេល ១ព្រឹក នាថ្ងៃទី២៦ ខែវិច្ឆិកានេះ ចៅក្រមសាលាដំបូងរាជធានីភ្នំពេញ បានប្រកាសថា នឹងបន្តសវនាការ ជំនុំជម្រះលើជនជាប់ចោទ ១៣៩នាក់ ដែលចូលរួមក្នុងផែនការនោះ ទៅធ្វើនៅថ្ងៃទី១៤ ខែមករា និងថ្ងៃទី០៤ ខែមីនា ឆ្នាំ២០២១ បន្តទៀត។
ក្នុងចំណោមជនជាប់ចោទទាំង ១៣៩នាក់ នៅក្នុងសំណុំរឿងនេះ គឺមានជនជាប់ចោទ ៣៤នាក់ប៉ុណ្ណោះ បានចូលរួម សវនាការ ជំនុំជម្រះ កាលពីព្រឹកថ្ងៃទី២៦ ខែវិច្ឆិកានេះ។
សំណុំរឿងនេះ ពាក់ព័ន្ធនឹងការចូលរួមក្នុងផែនការប៉ុនប៉ងធ្វើរដ្ឋប្រហារផ្តួលរំលំ រាជរដ្ឋាភិបាលស្របច្បាប់ តាមរយៈព្រឹត្តិការណ៍ ថ្ងៃ៩ វិច្ឆិកា ដែលទណ្ឌិត សម រង្ស៉ី បានប្រកាសពីគម្រោងវិលត្រឡប់ពីក្រៅប្រទេស ចូលមកកម្ពុជា កាលពីថ្ងៃទី៩ ខែវិច្ឆិកា ឆ្នាំ២០១៩។
អតីតក្រុមសមាជិកបក្សប្រឆាំង ជាជនជាប់ចោទទាំង ១៣៩នាក់ ត្រូវបានតុលាការកោះហៅឲ្យចូលខ្លួន មកជំនុំជម្រះទោស ពីបទចោទប្រកាន់ «រួមគំនិតក្បត់» និង «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម»។ ដីកាកោះហៅនោះ ត្រូវបានសមត្ថកិច្ច យកទៅបិទនៅអតីតស្នាក់ការអតីតគណបក្សសង្គ្រោះជាតិ តាមផ្លូវជាតិលេខ២។
យ៉ាងណាក៏ដោយ បន្ទាប់ពីការសាកសួរជនជាប់ចោទទាំង ៣៤នាក់ ក្នុងសវនាការ រយៈពេល ១ព្រឹករួចមក ចៅក្រម បានសម្រេចបំបែកសំណុំរឿងជាពីរ ហើយលើកពេលសវនាការ។ នោះគឺសំណុំរឿងទី១ នឹងបន្តសវនាការ នៅព្រឹកថ្ងៃទី១៤ ខែមករា ឆ្នាំ២០២១ និងសំណុំរឿងទី២ នឹងបន្តសវនាការ នៅព្រឹកថ្ងៃទី០៤ ខែមីនា ឆ្នាំ២០២១។
នៅខាងក្រៅតុលាការសាលាដំបូងរាជធានីភ្នំពេញ មានប៉ូលិសចរាចរណ៍ រួមទាំងកងកម្លាំងសន្តិសុខជាច្រើននាក់ ត្រូវបានដាក់ពង្រាយ ដើម្បីរៀបចំសម្រួលចរាចរណ៍ និងសណ្តាប់ធ្នាប់ ខណៈដែលមានក្រុមអ្នកគាំទ្រជនជាប់ចោទ ប្រមាណ ៥០នាក់ បានប្រមូលផ្តុំ នៅមុខតុលាការ និងនៅតាមផ្លូវមុខតុលាការ ជាប់របងស្តាតអូឡាំពិក៕
