(ភ្នំពេញ)៖ ក្នុងឱកាសជួបសំណេះសំណាល និងពិនិត្យលទ្ធផលការងាររបស់សមាជិកក្រុមមេធាវីរាជរដ្ឋាភិបាល និងមេធាវីស្ម័គ្រចិត្តសម្តេចតេជោ នៅព្រឹកថ្ងៃទី២៥ ខែវិច្ឆិកានេះ នៅវិមានសន្តិភាព សម្តេចតេជោ ហ៊ុន សែន បានណែនាំដល់លោក លី ច័ន្ទតុលា ប្រធានគណៈមេធាវីថ្មី ឱ្យធ្វើរបាយការណ៍ច្បាស់លាស់រឿងថវិកាបេសកកម្ម និងរបាយការណ៍ការងារ។

សម្តេចតេជោ ហ៊ុន សែន បានថ្លែង៖ «សុំឲ្យឯកឧត្តម តុលា ថ្ងៃក្រោយពិនិត្យមើលផងដែរអំពីការចំណាយ ដែលថវិការដ្ឋផ្តល់ឲ្យគណៈមេធាវី ការចាយវាយត្រូវឲ្យចំទិសដៅ និងបម្រើទៅឲ្យជនក្រីក្រពិតប្រាកដ។ ប្រសិនបើអាចធ្វើទៅបាន គួរតែធ្វើរបាយការណ៍មួយក្នុងប៉ុន្មានឆ្នាំដែលចាប់ផ្តើមទទួលថវិកាពីរាជរដ្ឋាភិបាល ការពារក្តីបានប៉ុន្មាន ផ្តល់ការពិគ្រោះផ្លូវច្បាប់បានប៉ុន្មាន? អាចធ្វើរបាយការណ៍នឹងមួយ»​។ 

គួរបញ្ជាក់ថា លោកមេធាវី លី ច័ន្ទតុលា បានក្លាយជាប្រធានគណៈមេធាវី អាណត្ដិទី១៣ ឆ្នាំ២០២០-២០២២ នៃកម្ពុជា ក្រោយការបោះឆ្នោត ក្នុងមហាសន្និបាតរបស់គណៈមេធាវី នៅព្រឹកថ្ងៃទី១៦ ខែតុលា ឆ្នាំ២០២០នេះ។ លោកទទួលបាន១៤៤៤សំឡេង នាំមុខគេក្នុងចំណោមអ្នកឈរឈ្មោះ៕