(ភ្នំពេញ)៖ តាមកម្មវិធី ដែលបានគ្រោងទុក នៅព្រឹកថ្ងៃទី២៥ ខែវិច្ឆិកានេះ រដ្ឋសភា ប្រជុំពិភាក្សា និងអនុម័តលើសេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២១ ឬហៅថា ច្បាប់ថវិកាជាតិ ឆ្នាំ២០២១។ សេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២១ មាន ៦ជំពូក និង ១៥មាត្រា បានកំណត់ពីគម្រោងចំណាយថវិកាជាតិ នៅឆ្នាំ២០២១ ចំនួន ៣០ ៤៩១ ៣៣៦លានរៀល ស្មើប្រមាណ ៧៥០០ លានដុល្លារអាម៉េរិក ថយចុះ ១,៩% ធៀបនឹងឆ្នាំ២០២០។
ក្នុងឆ្នាំ២០២១ រាជរដ្ឋាភិបាល បានបញ្ជាក់ថា បៀវត្សរ៍អប្បបរមា (ទាបបំផុត) របស់មន្ត្រីរាជការស៊ីវិល និងកងកម្លាំងប្រដាប់អាវុធ នឹងត្រូវរក្សាកម្រិតឆ្នាំ២០២០ ដើម្បីសន្សំថវិកា សម្រាប់ទប់ទល់ការរាតត្បាតនៃជំងឺកូវីដ-១៩ និងគ្រោះមហន្តរាយទឹកជំនន់រដូវវស្សាឆ្នាំ២០២០។
សេចក្តីថ្លែងហេតុ បានកត់សម្គាល់ថា ថវិកាជាតិឆ្នាំ២០២១ ត្រូវបានរាជរដ្ឋាភិបាលចាត់ទុកថា ជាឧបករណ៍ដ៏មានប្រសិទ្ធភាព ដែលអាចជួយឆ្លើយតបទៅនឹងបញ្ហាប្រឈម និងហានិភ័យមួយចំនួន ទាំងក្នុងនិងក្រៅប្រទេស សំដៅធានាលំនឹងសង្គម-សេដ្ឋកិច្ចកម្ពុជា ធានាសុខសន្តិភាព ស្ថិរភាព និងការពារអាយុជីវិតប្រជាជន ពីការរាតត្បាតនៃជំងឺកូវីដ-១៩ ព្រមទាំងការស្តារ និងជំរុញការងើបឡើងវិញនូវកំណើនសេដ្ឋកិច្ច ក្រោយពីវិបត្តិនៃជំងឺកូវីដ-១៩ ជាដើម៕
