(ភ្នំពេញ)៖ នៅព្រឹកថ្ងៃទីថ្ងៃទី២៥ ខែវិច្ឆិកានេះ សម្តេចតេជោ នាយករដ្ឋមន្ត្រី ហ៊ុន សែន បានជួបប្រជុំ សំណេះសំណាលជាមួយក្រុមមេធាវីស្ម័គ្រចិត្តរបស់សម្តេច ចំនួន ១៥០នាក់។ កម្មវិធីនេះ ធ្វើឡើង នៅវិមានសន្តិភាព ក្នុងរាជធានីភ្នំពេញ។
«មេធាវីស្ម័គ្រចិត្តសម្តេចតេជោសែន» ដឹកនាំដោយឯកឧត្តមមេធាវី គី តិច និងមានសមាជិកសរុប ១៣៨រូប នៅគ្រប់រាជធានី-ខេត្ត។ មេធាវីស្ម័គ្រចិត្តសម្តេចតេជោសែន ត្រូវបានសម្តេចតេជោ ហ៊ុន សែន បង្កើតឡើង កាលពីខែកុម្ភៈ ឆ្នាំ២០១៩ ក្នុងគោលដៅជួយការពារក្តីជូនស្ត្រី មានជីវភាពខ្វះខាត និងមិនមានលទ្ធភាពទទួលបានការការពារសិទ្ធិតាមផ្លូវច្បាប់។
តាមរបាយការណ៍ គិតត្រឹមខែកញ្ញា ឆ្នាំ២០២០ «មេធាវីស្ម័គ្រចិត្តសម្តេចតេជោសែន» បានផ្តល់ការពិគ្រោះ និងជូនយោបល់ដល់ប្រជាពលរដ្ឋទូទៅ គ្រប់ករណីក្នុងក្របខណ្ឌទូទាំងប្រទេសប្រមាណ ២,៥៥០ករណី។ ក្នុងនោះ សំណុំរឿង ដែលបានទទួលយកមកការពារជូនស្ត្រីទន់ខ្សោយងាយរងគ្រោះ មានជីវភាពខ្វះខាត និងខ្វះការការពារសិទ្ធិតាមផ្លូវច្បាប់ ចំនួន ៧៤ករណី។
ក្រៅពីជួយដោះស្រាយ និងការពារក្តី «មេធាវីស្ម័គ្រចិត្តសម្តេចតេជោសែន» ក៏បានធ្វើកិច្ចការសង្គម និងមនុស្សធម៌ផងដែរ។ ដូចជា បានសហការជាមួយរដ្ឋបាលខេត្តសៀមរាប អាជ្ញាធរអប្សរា សាលាដំបូង និងអយ្យការសាលាដំបូងខេត្តសៀមរាប និងខេត្តបន្ទាយមានជ័យ ដាំកូនឈើក្នុងបរិវេណប្រាសាទអង្គរតូចផ្នែកខាងត្បូង។
«មេធាវីស្ម័គ្រចិត្តសម្តេចតេជោសែន» ក៏បានជួយផ្តល់សម្ភារៈបរិក្ខារ គ្រឿងឧបភោគបរិភោគ និងថវិកា ដល់ប្រជាពលរដ្ឋ ដែលទទួលរងគ្រោះដោយអគ្គិភ័យ ដោយខ្យល់កន្ត្រាក់ រងគ្រោះដោយទឹកជំនន់ទឹកភ្លៀង និងស្ត្រីមេម៉ាយ ចាស់ជរា ដែលមានជីវភាពខ្វះខាត និងបានប្រមូលថវិកាពីសមាជិក ជូនរាជរដ្ឋាភិបាល ក្នុងយុទ្ធនាការទប់ស្កាត់ និងប្រយុទ្ធប្រឆាំងមេរោគកូវីដ១៩ ផងដែរ៕
