(សឹង្ហបុរី)៖ ក្រសួងការបរទេសបានឱ្យដឹងថា នាយករដ្ឋមន្ត្រីសិង្ហបុរី លោក លី សៀនឡុង បានផ្ញើសារអបអរសាទរ លោកស្រី អោងសាន ស៊ូជី បន្ទាប់ពីទទួលបានជោគជ័យនៅក្នុងការបោះឆ្នោតនៅប្រទេសមីយ៉ាន់ម៉ាកាលពីថ្ងៃអាទិត្យ។ នេះបើយោងតាមការចុះផ្សាយរបស់ CNA នៅថ្ងៃទី១៣ ខែវិច្ឆិកា ឆ្នាំ២០២០។

នៅក្នុងលិខិតសារអបអរសាទរ លោក លី សៀនឡុង បានថ្លែងថា «លទ្ធផលនេះឆ្លុះបញ្ចាំងពីទំនុកចិត្ត និងការជឿទុកចិត្តរបស់ប្រជាជនមីយ៉ាន់ម៉ា មកលើមេដឹកនាំរបស់គណបក្ស NLD របស់លោកស្រី អោងសាន ស៊ូជី»។ លោក លី បានបន្ថែមថា «មីយ៉ាន់ម៉ា និងសឹង្ហបុរី មិត្តចាស់និងជាដៃគូយូរអង្វែង មានកិច្ចសហប្រតិបត្តិការយ៉ាងទូលំទូលាយក្នុងវិស័យជាច្រើនរួមមាន ពាណិជ្ជកម្ម និងវិនិយោគ កិច្ចសហប្រតិបត្តិការហិរញ្ញវត្ថុ និងច្បាប់ការអភិវឌ្ឍន៍ហេដ្ឋារចនាសម្ព័ន្ធ និងការកសាងសមត្ថភាព»។

នាយករដ្ឋមន្ត្រីសិង្ហបុរី បានមានប្រសាសន៍ថា «ខ្ញុំទន្ទឹងរង់ចាំធ្វើការជាមួយអ្នកដើម្បីពង្រឹងទំនាក់ទំនងដែលមានស្រាប់របស់យើងនិងស្វែងរកវិស័យថ្មីៗនៃកិច្ចសហប្រតិបត្តិការ»។ លោក លី ក៏បានជូនពរលោកស្រី អោងសាន ស៊ូជី ឱ្យបន្តជោគជ័យ និងសុខភាពល្អ ដោយលោកសង្ឃឹមថានឹងស្វាគមន៍លោកស្រីនៅប្រទេសសិង្ហបុរីម្តងទៀត៕