(កូរ៉េ)៖ កីឡាការិនីឆ្នើម ស្រួង ភាវី បានទទួលជ័យជំនះជាថ្មីក្នុងការប្រកួតវាយស្នូកឃ័ររបស់សហព័ន្ធទីក្រុងសេអ៊ូល ដែលជាកម្មវិធីប្រកួតតំណាងក្រុមហ៊ុននៅប្រទេសកូរ៉េ និងកំពុងរំពឹងជ័យជំនះសម្រាប់ប្រកួតបន្តបន្ទាប់ទៀត។ នេះបើតាមលើកឡើងក្នុងទំព័រហ្វេសប៊ុកផ្ទាល់របស់កីឡាការិនីរូបនេះ នៅថ្ងៃទី១៣ ខែវិច្ឆិកា ឆ្នាំ២០២០​។

ការប្រកួតនេះធ្វើឡើងក្នុងរយៈពេលប៉ុន្មានថ្ងៃនេះ ដែលជាកម្មវិធីប្រកួតតំណាងក្រុមហ៊ុន ហារិបធំ នៅប្រទេសកូរ៉េ។ ក្នុងនោះដែរ ការប្រកួតនេះមាន ២ កន្លែង ដែលតាមការលើកឡើងរបស់កីឡាការិនី ស្រួង ភាវី ដែលបានទទួលជ័យជំនះលេខ ១​ មួយកន្លែងរួចហើយ។ នៅកន្លែងមួយទៀត កីឡាការិនីរូបនេះក៏បង្ហាញពីភាពជឿជាក់យ៉ាងមោះមុតថានឹងអាចបន្តទទួលយកជ័យជំនះបន្តទៀត។

ក្នុងនោះដែរ កីឡាការិនី ភាវី ក៏បានបង្ហើបពីចំណាប់អារម្មណ៍ពាក់ព័ន្ធនឹងការខិតខំប្រឹងប្រែងក្នុងអាជីពរបស់ខ្លួន ដោយជឿជាក់ថា «អ្វីគ្រប់យ៉ាងដែលកើតឡើងក្នុងជីវិតខ្ញុំ សុទ្ធតែជារឿងអស្ចារ្យ សូម្បីតែភាពបរាជ័យ ជីវិតមនុស្សគ្រប់រូប គ្មាននរណាម្នាក់ដែលជួបតែរឿងល្អស្រស់បំព្រងនោះទេ ក៏មានពេលខ្លះទទួលភាពបរាជ័យ ឈឺចាប់ ស្រក់ទឹកភ្នែក គ្រាំគ្រាចិត្ត ប៉ុន្ដែអ្វីគ្រប់យ៉ាងដែលបានកើតឡើងសុទ្ធតែផ្ដល់បទពិសោធ និងមេរៀនជីវិតសំរាប់យើង។»

កីឡាការិនីរូបនេះបានបន្តលើកឡើងថា «ពីព្រោះតែពាក្យថា «មហិច្ចតា» ទើបខ្ញុំជោគជ័យដូចសព្វថ្ងៃនេះមហិច្ចតា គឺជាការកត្តាដ៏ចាំបាច់មួយក្នុងការជំរុញទឹកចិត្តរបស់បុគ្គលគ្រប់រូបឲ្យមានភាពតស៊ូសម្រេចនូវគោលដៅ ប្រសិនបើបុគ្គលណាដែលគ្មាន មហិច្ចតា នោះទេ ពួកគេនឹងធ្វើតែរឿងសាមញ្ញៗ និងទទួលបានតែលទ្ធផលសាមញ្ញៗ ប៉ុណ្ណោះ»។

សូមជម្រាបថា កីឡាការិនីផ្នែកស្នូកឃ័រតំណាងឲ្យប្រទេសកម្ពុជា អ្នកស្រី ស្រួង ភាវី កើតនៅថ្ងៃទី១២ ខែកញ្ញា ឆ្នាំ១៩៩០ គឺជាកូនកសិកក្រីក្រមួយរូប ស្ថិតនៅក្នុងភូមិថ្មពេជ្រ៣ ឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ។ អ្នកស្រីមានស្វាមីជាជនជាតិកូរ៉េខាងត្បូង ដោយបច្ចុប្បន្ននេះអ្នកស្រីកំពុងរស់នៅប្រទេសកូរ៉េខាងត្បូងទៀតផង។

អស់រយៈពេលជាង១០ឆ្នាំមកហើយ ដែលកីឡាការិនីរូបនេះបានសាងកេរ្តិ៍ឈ្មោះ លើឆាកអន្តរជាតិ ពោលគឺអ្នកស្រី ស្រួង ភាវី ធ្លាប់បានឈ្នះពានរង្វាន់ធំៗជាច្រើន និងបានធ្វើឲ្យអន្តរជាតិស្គាល់កម្ពុជាកាន់តែខ្លាំង៕