(ភ្នំពេញ)៖ ក្រសួងសុខាភិបាល បានប្រកាសថា ស្ត្រីជនជាតិបារាំង អាយុ ២៣ឆ្នាំ មានអាសយដ្ឋានស្នាក់នៅសណ្ឋាគារមួយ ក្នុងរាជធានីភ្នំពេញ បានធ្វើដំណើរមកពីប្រទេសបារាំង ដោយឆ្លងកាត់ប្រទេសសឹង្ហបុរី បានមកដល់កម្ពុជា នៅថ្ងៃទី២៥ ខែតុលា ឆ្នាំ២០២០។ ស្ត្រីជនជាតិបារាំងនេះ ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន ២ដង និងត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត។
ក្រសួងសុខាភិបាល បានប្រកាសនៅព្រឹកថ្ងៃទី១៣ ខែវិច្ឆិកានេះថា មិនមានករណីវិជ្ជមានវីរុសកូវីដ១៩ ឡើយ កាលពីថ្ងៃទី១២ ខែវិច្ឆិកា ឆ្នាំ២០២០។
ជារួម គិតត្រឹមម៉ោង ៧ព្រឹក ថ្ងៃទី១៣ ខែវិច្ឆិកា ឆ្នាំ២០២០ ស្ថានភាពជំងឺកូវីដ១៩ នៅកម្ពុជា គឺរកឃើញអ្នកមានវីរុសកូវីដ១៩ សរុបចំនួន ៣០១នាក់។ ក្នុងនោះ ២៨៩នាក់ ត្រូវបានព្យាបាលជាសះស្បើយ និង១២នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ៕
