(កែប)៖ ក្រុមការងារក្រសួងបរិស្ថាន និងអាជ្ញាធរពាក់ព័ន្ធ នៅថ្ងៃទី១២ ខែវិច្ឆិកានេះ បានចុះទៅឧទ្យានជាតិកែប ដើម្បីពិនិត្យ និងសិក្សាទីតាំង ស្នើសុំសាងសង់ខ្សែរ៉កសម្រាប់ភ្ញៀវទេសចរដែលមកកម្សាន្តនៅខេត្តកែបអាចទស្សនាទេសភាពដ៏ល្អគយគន់នៃសម្រស់ឆ្នេរសមុទ្រកែប និងព្រៃព្រឹក្សាក្នុងឧទ្យានជាតិ។
ឧទ្យានជាតិកែបជាឧទ្យានតែមួយគត់នៅកម្ពុជាដែលមានទីតាំងនៅកណ្តាលក្រុង អំណោយផលនិងជាទីទាក់ទាញភ្ញៀវទេសចរ។ សព្វថ្ងៃ ទេសចរបរទេសនិងខ្មែរមួយចំនួនបានដើរកម្សាន្តជុំវិញឧទ្យាននេះ។
ឧទ្យានជាតិកែបជាបេះដូងទេសចរណ៍នៃខេត្តកែប ដែលមានចម្ងាយប្រមាណ ២៥គីឡូម៉ែត្រ ពីទីក្រុងកំពត ហើយមានចម្ងាយ ១៧៣គីឡូម៉ែត្រពីរាជធានីភ្នំពេញ។ ផ្លូវឡើងឧទ្យានជាតិកែប ស្ថិតនៅក្បែររីសតវេរ៉ង់ដា ចម្ងាយប្រមាណ ៧,៦គីឡូម៉ែត្រ ពីរង្វល់មូលរូបសំណាក់សេះសក្នុងក្រុងកែប។ ឧទ្យានជាតិកែបក៏មានព្រំប្រទល់ប្រមាណ ១៥គីឡូម៉ែត្រក្រៅពីផ្លូវគោក ហើយសម្រាប់ផ្លូវសមុទ្រវិញឧទ្យានជាតិកែបគឺជាមធ្យោបាយគមនាគមន៍ដ៏សំខាន់ សម្រាប់សហគមន៍ក្នុងតំបន់នោះផងដែរ។
លើសពីនេះ វាបានផ្តល់នូវធនធានសមុទ្រដ៏ច្រើនដល់ប្រជាជនក្នុងតំបន់ដូចជា ត្រី ក្តាម បង្គា មឹក លៀស ខ្យង ងាវ -ល-។ ផ្នែកមួយចំនួននៃមាត់សមុទ្រនៅភាគខាងកើត និងខាងលិចនៃឧទ្យានជាតិកែប គឺមានព្រៃកោងកាងលាតសន្ធឹងពីតំនាបទឹកប្រៃរហូតដល់មាត់សមុទ្រ ហើយព្រៃកោងកាងទាំងនេះបានផ្តល់ជាថ្នាលបណ្តុះពូជ និង ជាទីសម្បុកពង កូនដល់ពពួកត្រី ក្តាម ខ្យង ល្មូន និងសត្វសមុទ្រជាច្រើនប្រភេទផ្សេងទៀត។
ក្រៅពីនេះទៅទៀត ឧទ្យានជាតិកែបក៏ធ្លាប់ជាតំបន់ជម្រកធម្មជាតិដ៏សំខាន់សម្រាប់សត្វព្រៃ ដូចជាសត្វចតុប្បាទ សត្វស្លាប ដែលសម្បូរបែបប្រកបទៅដោយជីវសាស្ត្រចម្រុះ និង សោភណភាពទេសភាពស្រស់បំព្រង៕
