(ភ្នំពេញ)៖ ដូចការគ្រោងទុក នៅព្រឹកថ្ងៃព្រហស្បតិ៍ ទី១២ ខែវិច្ឆិកានេះ ព្រឹទ្ធសភា បានប្រជុំពិនិត្យ និងអនុម័តលើសេចក្តីព្រាងច្បាប់ ស្តីពី ការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម។ សេចក្ដីព្រាងច្បាប់នេះ ត្រូវបានរដ្ឋសភា ប្រជុំពិភាក្សា និងអនុម័ត កាលពីថ្ងៃទី០២ ខែវិច្ឆិកា ឆ្នាំ២០២០។
ឯកឧត្តម វ៉ា គឹមហុង ទេសរដ្ឋមន្ដ្រីទទួលបន្ទុកកិច្ចការព្រំដែន និងជាប្រធានគណៈកម្មាធិការចម្រុះកិច្ចការព្រំដែន បានដឹកនាំប្រតិភូ ចូលរួមកិច្ចប្រជុំព្រឹទ្ធសភា នាព្រឹកថ្ងៃទី១២ ខែវិច្ឆិកានេះ ដើម្បីការពារសេចក្តីព្រាងច្បាប់ ស្តីពី ការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម។
ឯកឧត្តម ទេសរដ្ឋមន្ត្រី វ៉ា គីមហុង លើកឡើងថា សេចក្តីព្រាងច្បាប់ ស្តីពី ការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម តាក់តែងឡើងជាលាយលក្ខណ៍អក្សរ មានចំណងជើងនៃច្បាប់ ចែកជា ០៣មាត្រា និងមានសេចក្ដីថ្លែងហេតុ បញ្ជាក់អំពីហេតុផល និងគោលបំណងច្បាស់លាស់ គឺរាជរដ្ឋាភិបាលនៃព្រះរាជាណាចកម្ពុជា មានការប្ដេជ្ញាចិត្តដ៏មោះមុត និងសុឆន្ទៈ ដើម្បីសម្រេចឱ្យបានព្រំដែនកម្ពុជា ជាមួយប្រទេសជិតខាង ដោយឈរលើមូលដ្ឋានគោរពឯករាជ្យ អធិបតេយ្យភាព និងបូរណភាពទឹកដីនៃព្រះរាជាណាចក្រកម្ពុជា ស្របតាមមាត្រា២ ជំពូកទី១ នៃរដ្ឋធម្មនុញ្ញនៃព្រះរាជាណាចក្រកម្ពុជា ដើម្បីសុភមង្គល និងភាពរុងរឿងរបស់ប្រជាជាតិ និងប្រជាជនកម្ពុជា ប្រែក្លាយតំបន់ព្រំដែនទៅជាព្រំដែនមានសាមគ្គីភាព មិត្តភាព និងកិច្ចសហប្រតិបត្តិការល្អ ជាមួយប្រទេសភូមិផងរបងជាមួយ ស្របតាមគោលការណ៍ច្បាប់ជាតិ និងការអនុវត្តជាអន្ដរជាតិ ស្ដីពី បញ្ហាព្រំដែន។
ឯកឧត្តម បន្ថែមថា យោងតាមចំណុចទី៣ និងទី៤ ប្រការ៤ នៃសន្ធិសញ្ញាបំពេញបន្ថែមរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ទៅលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ ចុះថ្ងៃទី១០ ខែតុលា ឆ្នាំ២០០៥ បានអនុញ្ញាតឱ្យភាគីទាំងពីរ ផលិតផែនទីព្រំដែនរដ្ឋរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម និងធ្វើពិធីសារ ស្ដីពី ការបោះបង្គោលខណ្ឌសីមាព្រំដែនគោករវាងប្រទេសទាំងពីរ រួមមាន ឯកសារលម្អិតស្ដីពីព្រំដែន បណ្ដាបង្គោលព្រំដែន និងផែនទីព្រំដែន ដើម្បីសម្ដែងឡើងនូវទិសដើរនៃខ្សែព្រំដែន ព្រមទាំងទីតាំងបង្គោលព្រំដែន ដែលស្ថិតនៅតាមបណ្ដោយព្រំដែនទាំងមូល។
ឯកឧត្តមទេសរដ្ឋមន្ត្រី វ៉ា គីមហុង បន្ថែមថា កិច្ចខិតខំប្រឹងប្រែងនេះ បានជំរុញឱ្យព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម សម្រេចបាននូវសមិទ្ធផលការងារខណ្ឌសីមា និងបោះបង្គោលព្រំដែនគោក ៨៤% នៃខ្សែព្រំដែនរួម ដែលក្នុងនោះខណ្ឌសីមាព្រំដែន បានប្រវែង ១ ០៤៥គីឡូម៉ែត្រ និងបោះបង្គោលព្រំដែនធំ បានចំនួន ៣១៥បង្គោល បង្គោលខណ្ឌសីមាព្រំដែនបានចំនួន ១ ៥១១បង្គោល បង្គោលតម្រុយព្រំដែន បានចំនួន ២២១ និងចំណុចពិសេស ដើម្បីធ្វើឱ្យច្បាស់ទិសដើរនៃខ្សែព្រំដែន នៅលើដីជាក់ស្ដែងចំនួន ១ ០០០ សរុបមានចំនួន ៣ ០៤៧បង្គោល នៅលើដី និងនៅលើផែនទី។
ចំណែកឯឧត្តម សុខ ឥសាន សមាជិកព្រឹទ្ធសភា និងជាប្រធានគណៈកម្មការមហាផ្ទៃ ការពារជាតិ ទំនាក់ទំនងរដ្ឋសភា ព្រឹទ្ធសភា អធិការកិច្ច និងមុខងារសាធារណៈ បានលើកឡើងថា សេចក្ដីព្រាងច្បាប់នេះ ជាឯកសារបច្ចេកទេសផ្លូវច្បាប់ ដែលបានកត់ត្រាទុកយ៉ាងលម្អិតខ្សែព្រំដែនគោករវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ដែលជាការធានាការពារបូរណភាពទឹកដីកម្ពុជា ក្នុងរង្វង់ក្រឡាផ្ទៃ ១៨១.០៣៥ គីឡូម៉ែត្រក្រឡា ដោយផ្អែកលើផែនទីបោនខ្នាត ១/១០០ ០០០ ដែលបន្សល់ទុកដោយអាណានិគមនិយមបារាំង ដូចមាន ចែងក្នុងមាត្រា២ ជំពូកទី១ នៃរដ្ឋធម្មនុញ្ញនៃព្រះរាជាណាចក្រកម្ពុជា និងបានតម្កល់ទុកជាឯកសារ នៅអង្គការសហប្រជាជាតិ ដែលភាគីទាំងពីរបានឯកភាពគ្នាជាមូលដ្ឋាន ក្នុងការខណ្ឌសីមា និងបោះបង្គោលព្រំដែន អមដោយផែនទីឋានលេខាព្រំដែនគោកខ្នាត ១/២៥ ០០០ ចំនួន ៩២ផ្ទាំង ដែលរំលេចបង្គោលព្រំដែននៅលើផែនទី និងមានកត់ត្រានិយាមកាច្បាស់លាស់ ដើម្បីកត់សម្គាល់ សមិទ្ធផល ៨៤% ដែលសម្រេចបាន ដែលជាឯកសារគ្រឹះរឹងមាំ ក្នុងការការពារបូរណភាពទឹកដីកម្ពុជា ដោយកំណត់ខ្សែព្រំដែនមិនកែប្រែរឹងមាំ យូរអង្វែងសម្រាប់កូនខ្មែរជំនាន់ក្រោយ និងបង្កើនទំនាក់ទំនងអ្នកជិតខាងល្អ ថែរក្សាបាននូវព្រំដែនសន្ដិភាព សាមគ្គីភាព មិត្តភាព សហប្រតិបត្តិការ និងការអភិវឌ្ឍរវាងប្រជាជាតិ និងប្រជាជននៃប្រទេសទាំងពីរ។ លទ្ធផលនេះ គឺជាជោគជ័យនៃការអនុវត្តជាក់ស្ដែងនូវនយោបាយដ៏ត្រឹមត្រូវ របស់រាជរដ្ឋាភិបាលនៃព្រះរាជាណាចក្រកម្ពុជា ក្នុងការការពារឯករាជ្យ អធិបតេយ្យភាព និងបូរណភាពទឹកដី និងទទួលខុសត្រូវចំពោះប្រវត្តិសាស្ដ្រ ប្រទេសជាតិកម្ពុជា ស្របតាមមាត្រា៥២ ជំពូកទី៤ នៃរដ្ឋធម្មនុញ្ញនៃព្រះរាជាណាចក្រកម្ពុជា។
សូមរម្លឹកថា ក្រៅពីសេចក្តីព្រាងច្បាប់ ស្តីពី ការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម កិច្ចប្រជុំពេញអង្គព្រឹទ្ធសភា នាព្រឹកថ្ងៃទី១២ ខែវិច្ឆិកា ឆ្នាំ២០២០ ក៏បានប្រជុំពិនិត្យ ឲ្យយោបល់ និងអនុម័តលើរបៀបវារៈ ៥ទៀត រួមមាន៖ សេចក្តីព្រាងច្បាប់ ស្តីពី ការអនុម័តយល់ព្រមលើសន្ធិសញ្ញា ស្តីពី ការហាមឃាត់អាវុធនុយក្លេអ៊ែរ។ សេចក្តីព្រាងច្បាប់ ស្តីពី ការអនុម័តយល់ព្រមលើពិធីសារទីមួយ ធ្វើវិសោធនកម្មកិច្ចព្រមព្រៀង ស្តីពី ភាពជាដៃគូសេដ្ឋកិច្ចទូលំទូលាយ រវាងរដ្ឋជាសមាជិកសមាគមប្រជាជាតិអាស៊ីអាគ្នេយ៍ និងជប៉ុន។ សេចក្តីព្រាងច្បាប់ ស្តីពី ការអនុម័តយល់ព្រមលើពិធីសារអនុវត្តកញ្ចប់សន្យាទី១០ ក្រោមកិច្ចព្រមព្រៀងក្របខ័ណ្ឌអាស៊ាន ស្តីពី សេវាកម្ម។ សេចក្តីព្រាងច្បាប់ ស្តីពី ការអនុម័តយល់ព្រមលើកិច្ចព្រមព្រៀង ស្តីពី ការវិនិយោគក្រោមកិច្ចព្រមព្រៀងក្របខណ្ឌ ស្តីពី កិច្ចសហប្រតិបត្តិការសេដ្ឋកិច្ចទូលំទូលាយរវាងសមាគមប្រជាជាតិអាស៊ីអាគ្នេយ៍ និងសាធារណរដ្ឋឥណ្ឌា។ សេចក្តីព្រាងច្បាប់ ស្តីពី ការអនុម័តយល់ព្រមលើកិច្ចព្រមព្រៀង ស្តីពី ការវិនិយោគរវាងបណ្តារដ្ឋសមាជិកនៃសមាគមប្រជាជាតិអាស៊ីអាគ្នេយ៍ និងរដ្ឋបាលនៃតំបន់រដ្ឋបាលពិសេសហុងកុងនៃសាធារណរដ្ឋប្រជាមានិតចិន៕
