(អន្តរជាតិ)៖ អ្នកច្នៃម៉ូដដ៏ល្បីល្បាញបំផុតរបស់ប្រទេសជប៉ុនលោក Kenzo Takada ដែលជាស្ថាបនិកយីហោពិភពលោក Kenzod បានទទួលមរណភាពនៅក្រុងប៉ារីស ប្រទេសបារាំង កាលពីថ្ងៃអាទិត្យក្នុងវ័យ៨១ឆ្នាំបន្ទាប់ពីបានឆ្លងជំងឺ COVID-19។ នេះបើយោងតាមការចុះផ្សាយរបស់សារព័ត៌មាន CGTN នៅថ្ងៃទី០៥ ខែតុលា ឆ្នាំ២០២០។

ការិយាល័យរបស់គាត់នៅប្រទេសជប៉ុននិយាយថា លោក Takada Kenzo បានសម្រាកនៅក្នុងមន្ទីរពេទ្យនៅជិតទីក្រុងប៉ារីស ចាប់តាំងពីគាត់បានឆ្លងជំងឺ COVID-19 នៅពាក់កណ្តាលខែកញ្ញា។ ការិយាល័យនិយាយថា ស្ថានភាពរបស់គាត់កាន់តែយ៉ាប់យ៉ឺននៅដើមខែនេះ ហើយបានលោកទទួលមរណភាពនៅប្រហែលម៉ោង ៤ល្ងាច នៅថ្ងៃអាទិត្យម៉ោងនៅប្រទេសបារាំង។

លោក Takada Kenzo កើតនៅខេត្ត Hyogo ភាគខាងលិចនៃប្រទេសជប៉ុនក្នុងឆ្នាំ១៩៣៩ និងបានចូលរៀននៅមហាវិទ្យាល័យម៉ូដ Bunka នៅក្នុងទីក្រុងតូក្យូ។ លោក Takada Kenzo បានផ្លាស់ទៅទីក្រុងប៉ារីស ក្នុងឆ្នាំ១៩៦៥ នៅពេលគាត់មានអាយុ ២៥ឆ្នាំ។

នៅឆ្នាំ១៩៨៤ លោក Takada Kenzo ទទួលបានមេដាយ​ថ្នាក់​អស្សឫទ្ធិ Chevalier (Knight) de l’Ordre des Arts et des Lettres និង Légion d’honneur កាលពីឆ្នាំ២០១៦ ពីប្រទេសបារាំង ហើយបានទទួលមេដាយកិត្តិយសនៅប្រទេសជប៉ុនក្នុងឆ្នាំ១៩៩៩។ លោក Takada Kenzo ក៏បានរចនាឯកសណ្ឋានផ្លូវការសម្រាប់គណៈប្រតិភូជប៉ុន ក្នុងព្រឹត្តិការណ៍អូឡាំពិកក្រុងអាថែន ប្រទេសក្រិក កាលពីឆ្នាំ២០០៤ ផងដែរ៕