(ភ្នំពេញ)៖ ក្រសួងសុខាភិបាល បានប្រកាសនៅព្រឹកថ្ងៃទី៣០ ខែតុលា ឆ្នាំ២០២០ ថា បុរសជនជាតិខ្មែរម្នាក់ អាយុ ៥១ឆ្នាំ មានអាសយដ្ឋាន ស្នាក់នៅខណ្ឌទួលគោក រាជធានីភ្នំពេញ ជាមន្ត្រីផ្នែកប្រតិបត្តិការរបស់អង្គការសហប្រជាជាតិ ប្រចាំបេសកកម្ម នៅប្រទសស៊ូដង់ខាងត្បូង បានឆ្លងជំងឺកូវីដ១៩។ មន្ត្រីកងទ័ពមួកខៀវកម្ពុជារូបនេះ ស្ថិតក្នុងចំណោមអ្នកដំណើរ ៨៧នាក់ បានមកដល់ភ្នំពេញ កាលពីថ្ងៃទី២៨ ខែតុលា ឆ្នាំ២០២០។
កាលពីរសៀលថ្ងៃទី២៧ ខែតុលា ឆ្នាំ២០២០ កងកម្លាំងមួកខៀវកម្ពុជា ៧៣នាក់ ដែលបញ្ចប់បេសកកម្ម នៅប្រទេសស៊ូដង់ខាងត្បូង បានមកដល់ភ្នំពេញ។
នៅពេលចុះពីលើយន្តហោះភ្លាម ក្រុមគ្រូពេទ្យ បានពិនិត្យ និងយកសំណាកក្រុមកងកម្លាំងមួកខៀវទាំងអស់ យកទៅពិនិត្យរកមេរោគកូវីដ១៩ ហើយកងកម្លាំងទាំង ៧៣នាក់នោះ ត្រូវបានបញ្ជូនទៅធ្វើចត្តាឡីស័ក រយៈពេល ១៤ថ្ងៃ នៅវិទ្យាស្ថានរបស់មជ្ឈមណ្ឌលជាតិរក្សាសន្តិភាព ក្នុងស្រុកឧដុង្គ ខេត្តកំពង់ស្ពឺ។
យ៉ាងណាក៏ដោយ លទ្ធផលនៃការធ្វើតេស្តរកមេរោគជំងឺកូវីដ១៩ លើកងកម្លាំងមួកខៀវកម្ពុជាទាំងនោះ មិនត្រូវបានក្រសួងសុខាភិបាល ប្រកាសផ្សព្វផ្សាយទេ។
ក្រសួងសុខាភិបាល បានប្រកាសថា មកដល់ម៉ោង ៧ព្រឹក ថ្ងៃទី៣០ ខែតុលា ឆ្នាំ២០២០ នៅទូទាំងប្រទេសកម្ពុជា រកឃើញអ្នកឆ្លងជំងឺកូវីដ១៩ សរុបចំនួន ២៩១ នាក់។ ក្នុងនោះ ២៨៣នាក់ ត្រូវបានព្យាបាលជាសះស្បើយ និង ៨នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ ( បុរសជនជាតិខ្មែរ ៤នាក់ ស្ត្រីជនជាតិខ្មែរ ម្នាក់ បុរសជនជាតិប៉ូឡូញ ម្នាក់ បុរសជនជាតិបារាំង ម្នាក់ និងស្ត្រីជនជាតិបារាំង ម្នាក់ )៕
