(អន្តរជាតិ)៖ ក្រសួងការបរទេសអាមេរិក បានប្រកាសស្វាគមន៍ឥណ្ឌា ក្នុងនាមជាមហាអំណាចសកល និងប្រទេសនាំមុខគេ ក្នុងតំបន់។ អាមេរិក និងឥណ្ឌា ក៏នឹងសហការឲ្យកាន់តែជិតស្និទ្ធបន្ថែមទៀត នៅក្នុងពេលឥណ្ឌា ចូលជាសមាជិកមិនអចិន្ត្រៃយ៍របស់អង្គការសហប្រជាជាតិ ចាប់ពីថ្ងៃទី១ ខែមករា ឆ្នាំ២០២១។ នេះបើតាមសេចក្តីប្រកាសព័ត៌មានរបស់ក្រសួងការបរទេសអាមេរិក។
ក្រសួងការបរទេសអាមេរិក បានប្រកាសដូច្នេះ មុនកិច្ចប្រជុំថ្នាក់រដ្ឋមន្ត្រីការបរទេស និងរដ្ឋមន្ត្រីការពារជាតិ អាមេរិក-ឥណ្ឌា ដែលនឹងធ្វើឡើង នៅថ្ងៃទី២៧ ខែតុលា ឆ្នាំ២០២០ នៅទីក្រុងញ៉ូវដេលី ប្រទេសឥណ្ឌា។
កិច្ចប្រជុំរវាងលោក ម៉ៃ ប៉ុមភីអូ រដ្ឋមន្ត្រីការបរទេស និងលោក ម៉ាក អេស្ព័រ រដ្ឋមន្ត្រីការពារជាតិអាមេរិក ជាមួយរដ្ឋមន្ត្រីការបរទេសឥណ្ឌា លោក S Jaishankar និងរដ្ឋមន្ត្រីការពារជាតិឥណ្ឌា លោក Rajnath Singh ដើម្បីជជែកពីបញ្ហាសន្តិសុខតំបន់ និងការពង្រឹងទំនាក់ទំនងរវាងអាមេរិក-ឥណ្ឌា។
ជំនួបរដ្ឋមន្ត្រីការបរទេស និងការពារជាតិ រវាងអាមេរិក និងឥណ្ឌា នៅថ្ងៃទី២៧ ខែតុលា ឆ្នាំ២០២០ គឺជាកិច្ចប្រជុំ លើកទី៣ គិតចាប់ពីឆ្នាំ២០១៨។ កិច្ចប្រជុំរដ្ឋមន្ត្រីការទេស និងរដ្ឋមន្ត្រីការពារជាតិ អាមេរិក-ឥណ្ឌា លើកទី១ ធ្វើឡើង នៅខែធ្នូ ឆ្នាំ២០១៨ នៅទីក្រុងញូវដេលី ខណៈកិច្ចប្រជុំ លើកទីពីរ បានធ្វើឡើង នៅខែធ្នូ ឆ្នាំ២០១៩ នៅទីក្រុងវ៉ាស៊ីនតោន។
ក្រសួងការបរទេសអាមេរិក បានបញ្ជាក់ក្នុងសេចក្តីប្រកាសថា ការពង្រឹងទំនាក់ទំនងទ្វេភាគី អាមេរិក-ឥណ្ឌា ជាការបង្ហាញពីការពង្រឹងកិច្ចសហប្រតិបត្តិការយ៉ាងស៊ីជម្រៅលើបញ្ហាមួយចំនួន ការបង្កើតតម្លៃរួមគ្នា និងការប្តេជ្ញាលើកិច្ចសហប្រតិបត្តិការយុទ្ធសាស្ត្រសេរី និងបើកចំហ ក្នុងតំបន់អាស៊ី-បាស៊ីហ្វិក ជាដើម។
អាមេរិក និងឥណ្ឌា ក៏បានពង្រឹងទំនាក់ទំនងបន្ថែមទៀត តាមរយៈយន្តការកិច្ចសន្ទនាចតុភាគី (Quad)។ Quad ជាសម្ព័ន្ធមិត្តយោធា នៅអាស៊ី ដែលមានចរិត ជាណាតូ អាស៊ី រួមមាន៖ អាមេរិក ឥណ្ឌា ជប៉ុន និងអូស្ត្រាលី។ក្រុមប្រទេសទាំងនេះ នឹងមានសមយុទ្ធយោធារួមគ្នា នៅពេលខាងមុខ៕
