(ភ្នំពេញ)៖ ក្នុងពិធីបើកការដ្ឋានសាងសង់ ស្ពានបេតុងខ្សែកាប ឆ្លងកាត់ទន្លេបាសាក់ តភ្ជាប់រាជធានីភ្នំពេញ ពីទីក្រុងកោះពេជ្រ ទៅកាន់ទីក្រុងរណបកោះនរា និងពីកោះនរា ឆ្ពោះទៅផ្លូវជាតិលេខ១ ក្នុងភូមិសាស្ត្រសង្កាត់និរោធ ខណ្ឌច្បារអំពៅ រាជធានីភ្នំពេញ នាព្រឹកថ្ងៃទី២៦ ខែតុលា ឆ្នាំ២០២០ នេះ សម្តេចតេជោ នាយករដ្ឋមន្ត្រី ហ៊ុន សែន បានប្រកាសថា រាជរដ្ឋាភិបាល បានត្រៀមថវិកា ១៦០លានដុល្លារ ដើម្បីស្តារឡើងវិញ ក្រោយគ្រោះទឹកជំនន់ ដូចជា ការជួសជុលផ្លូវ ស្ពាន និងទំនប់ទឹក ដែលខូចខាតដោយជំនន់ទឹកភ្លៀង។
សម្តេចតេជោ ហ៊ុន សែន បានបញ្ជាក់ថា «យើងមានថវិកាមួយ ហៅថា ថវិកាមិនទាន់បែងចែក។ នៅក្នុងថវិកាមិនទាន់បែងចែកនេះ ក៏មានថវិកាបម្រុងសម្រាប់គ្រោះមហន្តរាយ។ បើថវិកាហ្នឹងអស់ យើងក៏នឹងបញ្ចេញថវិកាបន្ថែមទៀត ជាមួយនឹងគម្រោងទម្លាក់ថវិកា សាច់ប្រាក់ពលកម្ម ១៦០ លានដុល្លារ។ ជាថវិកាប្រយុទ្ធ ដើម្បីសង្គ្រោះជីវិត លំនឹងសង្គមសេដ្ឋកិច្ច និងជីវភាពប្រជាពលរដ្ឋ ព្រមទាំងតម្រង់ឆ្ពោះទៅរកការស្តារឡើងវិញ ក្រោយកូវីដ១៩»។
ជាមួយនឹងប្រសាសន៍ខាងលើនេះ សម្តេចតេជោ ហ៊ុន សែន ក៏បានប្រកាសបញ្ជាឲ្យរដ្ឋមន្ត្រី ៤ក្រសួង រួមមាន៖ ក្រសួងកសិកម្ម ក្រសួងសេដ្ឋកិច្ច ក្រសួងសាធារណការ និងដឹកជញ្ជូន និងក្រសួងអភិវឌ្ឍន៍ជនបទ ត្រូវរួមគ្នា ស្តារឡើងវិញ នូវផ្លូវ ស្ពាន ទំនប់ទឹក និងផ្តល់ពូជស្រូវដំណាំនានា ជូនប្រជាកសិករ ដែលរងគ្រោះ ដោយសារជំនន់ទឹកភ្លៀង នាពេលថ្មីៗនេះ។
សម្តេចតេជោ ហ៊ុន សែន បញ្ជាក់ថា «កុំចាំមន្ទីររាយការណ៍ មកភ្នំពេញ។ យើងចាត់រដ្ឋលេខាធិការ អនុរដ្ឋលេខាធិការ ចុះទៅតាមគោលដៅ។ កន្លែងខ្លះ ត្រូវចាត់ច្រើនក្រុមចុះទៅ ពិសេសនៅបាត់ដំបង និងខេត្តបន្ទាយមានជ័យ ដែលរងគ្រោះធ្ងន់ធ្ងរជាងគេ។ កុំឲ្យប្រជាពលរដ្ឋយើង គាត់លំបាកមួយសាហើយ ដោយសារទឹកលិច ពេលនេះ មកលំបាកមួយសាទៀត ក្រោយទឹកស្រក»។
រីឯគម្រោងបើកការដ្ឋានសាងសង់ផ្លូវនៅទីរួមខេត្តសៀមរាប ដោយចំណាយ ១៥០លានដុល្លារ ក៏ត្រូវបានសម្តេចតេជោ ហ៊ុន សែន ប្រកាសថា យើងនៅបន្ត ដោយនៅខែវិច្ឆិកាខាងមុខ សម្តេចនឹងអញ្ជើញបើកការដ្ឋាន បន្ទាប់ពីការសាងសង់ផ្លូវជាច្រើនខ្សែ នៅខេត្តព្រះសីហនុ៕
