(ភ្នំពេញ)៖ ទន្ទឹមនេះ ភាពប្រសើរឡើង នៃប្រព័ន្ធគ្រប់គ្រងហិរញ្ញវត្ថុសាធារណៈរបស់កម្ពុជា ក៏បានផ្តល់លទ្ធភាពដល់រាជរដ្ឋាភិបាល ក្នុងការធ្វើវិចារណកម្មចំណាយថវិកាឆ្នាំ២០២០ ចំនួន ២លើក ដែលអាចធ្វើឱ្យរាជរដ្ឋាភិបាលសន្សំថវិកាបានសរុប ចំនួន ៣ ៧១៦ ០៥៤ លានរៀល ឬសមមូលនឹងប្រមាណ ៩១៨លានដុល្លារអាមេរិក ក្នុងនោះ ថវិកាថ្នាក់ជាតិសន្សំ បាន ៦៧៧លានដុល្លារអាមេរិក សម្រាប់បំពេញតម្រូវការចំណាយចាំបាច់ ក្នុងការប្រយុទ្ធនឹងជំងឺកូវីដ-១៩ ក៏ដូចជាការទប់ទល់ផលប៉ះពាល់អវិជ្ជមានមកលើសង្គម-សេដ្ឋកិច្ចកម្ពុជា។
ដោយឡែកសម្រាប់រដ្ឋបាលថ្នាក់ក្រោមជាតិ ត្រូវបានកាត់បន្ថយចំណាយ ទៅតាមការថយចុះចំណូលចំនួន ២៤១ លានដុល្លារអាមេរិក ដើម្បីរក្សាតុល្យភាពចំណូល-ចំណាយថ្នាក់ក្រោមជាតិ។
របាយការណ៍ខាងលើនេះ ត្រូវបានក្រសួងសេដ្ឋកិច្ច និងហិរញ្ញវត្ថុ លើកបង្ហាញ ក្នុងសេចក្តីថ្លែងហេតុ លើសេចក្តីព្រាងច្បាប់ ស្តីពី ការគ្រប់គ្រងហិរញ្ញវត្ថុ សម្រាប់ឆ្នាំ២០២១ ឬហៅកាត់ថា ច្បាប់ថវិកាជាតិ ឆ្នាំ២០២១។ សេចក្តីព្រាងច្បាប់នេះ ត្រូវបានគណៈរដ្ឋមន្ត្រី ដឹកនាំដោយសម្តេចតេជោ ហ៊ុន សែន បានប្រជុំពិភាក្សា និងអនុម័ត នាព្រឹកថ្ងៃទី២៣ ខែតុលា ឆ្នាំ២០២០៕
