(ភ្នំពេញ)៖ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាល ទទួលបន្ទុកជាអគ្គនាយកបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ នៅក្នុងខណៈជាអធិបតីភាព ក្នុងកិច្ចប្រជុំប្រចាំខែ ស្តីពី បច្ចុប្បន្នភាពការងារជំនាញទាក់ទងនឹងរបបសន្តិសុខសង្គម ដល់លោក លោកស្រីជាប្រធាន អនុប្រធាន និងមន្រ្តី ប.ស.ស. តាមបណ្តាសាខាទូទាំងរាជធានី/ខេត្ត-ខណ្ឌ តាមប្រព័ន្ធវីដេអូ (Video Conference) នាព្រឹកនេះ បានថ្លែងនូវ​ការកោតសរសើរចំពោះថ្នាក់ដឹកនាំ ព្រមទាំងមន្រ្តី និងបុគ្គលិក បេឡាជាតិសន្តិសុខសង្គម ដែលកន្លងមកនេះ បានអនុវត្ត និងបំពេញការងាររបស់ខ្លួនទទួលបានលទ្ធផលល្អប្រសើរគួរឱ្យកត់សម្គាល់។ 

ទន្ទឹមគ្នានេះ ឯកឧត្តមប្រតិភូ ក៏បានមានប្រសាសន៍អំពីស្ថានភាពបច្ចុប្បន្ននៃប្រទេសកម្ពុជា ដែលកំពុងជួបប្រទះនូវបញ្ហាគ្រោះធម្មជាតិទឹកជំនន់ដោយសារ​ទឹកភ្លៀង តាមបណ្តាលខេត្តមួយចំនួន កំពុងទទួលរងផលប៉ះពាល់។ ដូចនេះ ឯកឧត្តមប្រតិភូ ស្នើសុំឱ្យថ្នាក់ដឹកនាំ មន្ត្រីរាជការ និងបុគ្គលិកតាមបណ្តាសាខាទូទាំងរាជធានី/ខេត្ត-ខណ្ឌ នីមួយៗ ជាពិសេសខេត្តដែលទទួលរងគ្រោះទឹកជំនន់ ត្រូវធ្វើយ៉ាងណាធានាសុវត្ថិភាពរបស់ខ្លួន និងបន្តអនុវត្តការងារឱ្យល្អប្រសើរជូនដល់បងប្អូនកម្មករនិយោជិត ដែលជាសមាជិក ប.ស.ស.។

ជាមួយគ្នានេះ ឯកឧត្តម លើកឡើងថា ​រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត និងភាពឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក៏សូមឱ្យប្រជាពលរដ្ឋ រក្សាសុវត្ថិភាពផ្ទាល់ខ្លួន ក្រុមគ្រួសារ ជាពិសេសប្រជាពលរដ្ឋដែលស្ថិតនៅតំបន់ ដែលកំពុងរងគ្រោះដោយទឹកជំនន់ ត្រូវជម្លៀសរកទីទួលសុវត្ថិភាព។ ជាការពិតណាស់ សម្តេចតែងតែគិតគូរ និងខ្វល់ខ្វាយបំផុត ពីសុខុមាលភាព និងជីវភាពរស់នៅរបស់បងប្អូនប្រជាពលរដ្ឋ ពិសេសបងប្អូនកម្មករនិយោជិត។

ក្នុងឱកាសនេះដែរ ឯកឧត្តមប្រតិភូរាជរដ្ឋាភិបាល បានជំរុញបន្ថែមទៅដល់លោក លោកស្រី ដែលជាថ្នាក់ដឹកនាំ មន្រ្តី និងបុគ្គលិក ប.ស.ស. គ្រប់ការិយាល័យ និងគ្រប់សាខាទូទាំងរាជធានី/ខេត្ត-ខណ្ឌទាំងអស់ ធ្វើយ៉ាងណា ពន្លឿនក្នុងការផ្តល់សេវាដល់សមាជិក ប.ស.ស. ឱ្យបានទាន់ពេលវេលា និងប្រកបដោយប្រសិទ្ធិភាពខ្ពស់ ព្រមទាំងផ្តល់ការសម្របសម្រួលឱ្យបានទាន់ពេលវេលាចំពោះបងប្អូន ដែលជាសមាជិកពេលទៅទទួលសេវានៅតាមមូលដ្ឋានសុខាភិបាល ដែលជាដៃគូ ប.ស.ស.។

សូមបញ្ជាក់ថា កិច្ចប្រជុំ​ខាងលើ ត្រូវបានប្រព្រឹត្តទៅ នាព្រឹកថ្ងៃពុធ ១២រោច ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៤ ខែតុលា ឆ្នាំ២០២០៕