(ភ្នំពេញ)៖ នៅយប់ម៉ោងជាង ៩យប់ ថ្ងៃទី១៣ ខែតុលា ឆ្នាំ២០២០ ទំនប់ស្ទឹងព្រែកត្នោត ស្ថិតក្នុងភូមិសាស្ត្រសង្កាត់សាក់សំពៅ ខណ្ឌដង្កោ រាជធានីភ្នំពេញ បានបាក់ ដោយសារតែទឹកហូរខ្លាំង។ ប្រជាពលរដ្ឋជាង ២០០ គ្រួសារ រស់នៅជិតទំនប់ស្ទឹងព្រែកត្នោត ក្នុងសង្កាត់សាក់សំពៅ ជិតសាលាសង្កាត់ បានរងផលប៉ះពាល់ តែត្រូវអាជ្ញាធរសមត្ថកិច្ចរាជធានីភ្នំពេញ ជួយសង្គ្រោះ ជម្លៀសទៅកាន់ទីទួលសុវត្ថិភាពហើយ។
អាជ្ញាធរសមត្ថកិច្ចរាជធានីភ្នំពេញ រួមទាំងអាជ្ញាធរសមត្ថកិច្ចខណ្ឌដង្កោ និងអាជ្ញាធរសមត្ថកិច្ចពាក់ព័ន្ធជាច្រើនទៀត កំពុងប្រចាំការ និងអន្តរាគមន៍ជួយសង្គ្រោះប្រជាពលរដ្ឋរងគ្រោះ។
ឯកឧត្តម ឃួង ស្រេង អភិបាលរាជធានីភ្នំពេញ ដែលកំពុងដឹកនាំបញ្ជាកម្លាំងនៅកន្លែងបាក់ទំនប់សណ្តរស្ទឺងព្រែកត្នោត បានរាយការណ៍តាមទូរស័ព្ទ ជម្រាបជូនសម្តេចតេជោ ហ៊ុន សែន ថា ទឹកស្ទឹងព្រែកត្នោត ដែលបាក់ទំនប់ហូរហៀរនេះ មិនចូលទៅកាន់តំបន់រោងចក្រ នៅតាមផ្លូវវេងស្រេងទេ តែទឹកបានហូរចាក់ទៅកាន់ផ្លូវជាតិលេខ២១ និងទៅស្រុកកណ្តាលស្ទឹង នៅភាគខាងត្បូងរាជធានីភ្នំពេញ៕
