(ភ្នំពេញ)៖ ដូចការគ្រោងទុក នៅព្រឹកថ្ងៃទី១៨ ខែធ្នូ ឆ្នាំ២០២០ ក្រសួងសុខាភិបាល បានបន្តធ្វើតេស្ត រកមេរោគកូវីដ១៩ លើកទី៣ ដែលជាលើកចុងក្រោយ ចំពោះអ្នកពាក់ព័ន្ធនៃព្រឹត្តិការណ៍សហគមន៍ ២៨ វិច្ឆិកា ដែលបានធ្វើតេស្ត ២លើកកន្លងមក។ ក្នុងនោះ មានមន្ត្រីក្រសួងមហាផ្ទៃជាង ១០០០នាក់ បុគ្គលិកធនាគារកាថេ និងបុគ្គលិកធនាគារចិន។ ការធ្វើតេស្តនេះ ធ្វើឡើងនៅបរិវេណក្រសួងមហាផ្ទៃ។
ក្រសួងសុខាភិបាល បានប្រកាសថា មន្ត្រីក្រសួងមហាផ្ទៃ ជាង ១ពាន់នាក់ ត្រូវធ្វើតេស្ត ចាប់ពីម៉ោង ៧ព្រឹក។ រីឯបុគ្គលិកធនាគារកាថេ និងធនាគារចិន ត្រូវធ្វើតេស្ត ចាប់ពីម៉ោង ១០ព្រឹក នាថ្ងៃទី១៨ ខែធ្នូនេះ។
ក្រសួងមហាផ្ទៃ បានចាត់តាំងក្រុមការងារ ដើម្បីចុះរៀបចំទីតាំង និងផែនការលំហូរ ដើម្បីជួយសម្របសម្រួលដល់ថ្នាក់ដឹកនាំ មន្ត្រីនគរបាលជាតិ និងមន្ត្រីរាជការស៊ីវិលនៃក្រសួងមហាផ្ទៃ ព្រមទាំងអ្នកដែលចូលរួមផ្តល់សំណាកធ្វើតេស្ត រកមេរោគកូវីដ១៩ បញ្ចប់ជាលើកទី៣ នៅថ្ងៃទី១៨ ខែធ្នូនេះ យ៉ាងមានរបៀបរៀបរយ ស្របតាមវិធានការអនាម័យរបស់ក្រសួងសុខាភិបាល៕
