(ភ្នំពេញ)៖ ឯកឧត្តម ជិន ម៉ាលីន អ្នកនាំពាក្យក្រសួងយុត្តិធម៌ នៅថ្ងៃនេះ បានអបអរសាទរខួបលើកទី៧២ នៃទិវាសិទ្ធិមនុស្សអន្តរជាតិ១០ ធ្នូ។

ទន្ទឹមនឹងនេះ ឯកឧត្តមបានលើកឡើងពី អ្វីដែលគួរធ្វើនិងមិនគួរធ្វើ សម្រាប់គ្រប់ភាគីពាក់ព័ន្ធ ក្នុងថ្ងៃប្រារព្ធទិវាសិទ្ធិមនុស្សអន្តរជាតិ១០ ធ្នូនេះ ៖ 

១. គួររួមគ្នាថ្លែងសារ និងធ្វើសកម្មភាពដែលជាប្រយោជន៍ដល់សង្គម ជាពិសេសសារដែលមានន័យជាការអប់រំពលរដ្ឋឱ្យយល់ដឹងពីសិទ្ធិនិងច្បាប់ និងការអនុវត្តសិទ្ធិសេរីភាពត្រឹមត្រូវតាមផ្លូវច្បាប់ ជៀសវាងការអនុវត្តសិទ្ធិដោយបំពាន បះពាល់សិទ្ធិសេរីភាពអ្នកដ៏ទៃ សណ្តាប់ធ្នាប់សាធារណៈ និងសន្តិសុខសង្គម ដែលអាចនាំឱ្យមានការប្រឈមមុខតាមផ្លូវច្បាប់ជាយថាហេតុណាមួយ។

២. មិនគួរឆ្លៀតប្រើប្រាស់ទិវានេះជារបៀបវារៈនយោបាយ ក្នុងការរិះគន់និងបន្តុះបង្អាប់រដ្ឋាភិបាលនិងសមត្ថកិច្ច ដោយថ្លែងសារនយោបាយដែលមានចរិតជាការញុះញង់ បំផ្លើស បំភ្លៃ ខុសពីការពិត និងមានខ្លឹមសារផ្ទុយពីរដ្ឋធម្មនុញ្ញនិងច្បាប់របស់កម្ពុជានោះទេ ដូចជាការដាក់សម្ពាធលើតុលាការដែលជាស្ថាប័នឯករាជ្យ ឱ្យធ្វើការដោះលែង ឬទម្លាក់ចោលបទចោទ ចំពោះជនជាប់ចោទដែលកំពុងស្ថិតក្នុងដំណើរការនីតិវិធីរបស់តុលាការជាដើម។ល។ ទង្វើនិងសកម្មភាពក្នុងការការពារដោយបំពានច្បាប់ ចំពោះជនដែលបានប្រព្រឹត្តល្មើសទៅនឹងច្បាប់បែបនេះ មិនមែនជាកិច្ចគាំពារនិងលើកស្ទួយសិទ្ធិមនុស្សនោះទេ តែផ្ទុយទៅវិញ វាបាននិងកំពុងលើកទឹកចិត្តមនុស្សឱ្យកាន់តែធ្វើសកម្មភាពបំពានច្បាប់ ដោយមិនមានការញញើត ខ្លាចរអា និងរៀងចាល ហើយដែលនេះអាចបង្កជាហានិភ័យធ្ងន់ធ្ងដល់សង្គម៕