(ភ្នំពេញ)៖ បន្ទាប់ពីការធ្វើតេស្តរកមេរោគកូវីដ១៩ លើកទី១ កាលពីថ្ងៃទី២៩ ខែវិច្ឆិការួចមក នៅព្រឹកថ្ងៃទី៣០ ខែវិច្ឆិកានេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលកំពុងធ្វើចត្តាឡីស័ក បានចេញបទបញ្ជាផ្ទាល់មាត់ ដល់មន្ត្រីគ្រប់ជាន់ថ្នាក់របស់ក្រសួងមហាផ្ទៃ ត្រូវធ្វើចត្តាឡីស័កឲ្យបានត្រឹមត្រូវ តាមការកំណត់របស់ក្រសួងសុខាភិបាល ដោយមិនត្រូវចេញក្រៅផ្ទះឡើយ។ សម្តេចក្រឡាហោម ស ខេង ក៏បានសម្រេចបិទកន្លែងធ្វើការរបស់អគ្គនាយកដ្ឋានពន្ធនាគារ នៅក្នុងបរិវេណក្រសួងមហាផ្ទៃ ក្នុងអំឡុងពេលឆ្លងរាលដាលជំងឺកូវីដ១៩ នេះ។
សម្តេចក្រឡាហោម ស ខេង បានលើកឡើងថា «ជាថ្មីម្តងទៀត ខ្ញុំសូមរម្លឹកថ្នាក់ដឹកនាំ ចាប់ពីរដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ប្រធាននាយកដ្ឋាន អនុប្រធាននាយកដ្ឋាន ប្រធានការិយាល័យ អីទាំងអស់ហ្នឹង! អ្នកដែលបានយកសំណាកទៅពិនិត្យ ទោះបីថា លទ្ធផលវាអវិជ្ជមានក្តី អត់មានអីក៏ដោយ គឺថា មិនត្រូវចេញដំណើររហេតរហូត ឬក៏ថា បាចហាចទៅគុយទាវកន្លែងនេះ ទៅគុយទាវកន្លែងនោះ ហាងកន្លែងនេះ ហាងកន្លែងនោះ ទៅទិញកន្លែងនេះ ទៅទិញកន្លែងនោះទេ។ អាហ្នឹង វាបញ្ហាម្យ៉ាងខ្លួនយើងផ្ទាល់។ ប៉ុន្តែត្រូវគិតដល់ប្រជាជនផង!»។
សម្តេចក្រឡាហោម ស ខេង ក៏បានបញ្ជាទៅឯកឧត្តម សក់ សេដ្ឋា និងឯកឧត្តម ខៀវ សុភ័គ រដ្ឋលេខាធិការក្រសួងមហាផ្ទៃ សរសេរលិខិត ជាបទបញ្ជាមួយ ជូនសម្តេចក្រឡាហោមផ្ទាល់ ដើម្បីចុះហត្ថលេខាលើបទបញ្ជានេះ ដោយទី១ ក្រសួងមហាផ្ទៃ ត្រូវបិទកន្លែងធ្វើការរបស់អគ្គនាយកដ្ឋានពន្ធនាគារ ហើយទី២ មន្ត្រីត្រូវបានយកសំណាកទៅពិនិត្យ ទោះបីជាមានលទ្ធផលអវិជ្ជមានក៏ដោយ គឺត្រូវគោរពតាមពេទ្យ ធ្វើចត្តាឡីស័ក ហើយមិនត្រូវធ្វើដំណើរចេញក្រៅផ្ទះទេ។
សូមរម្លឹកថា នៅព្រឹកថ្ងៃទី៣០ ខែវិច្ឆិកានេះ ក្រសួងសុខាភិបាល បានប្រកាសថា មានអ្នកឆ្លងជំងឺកូវីដ១៩ថ្មី ចំនួន ៨នាក់ទៀត ពាក់ព័ន្ធនឹងព្រឹត្តិការណ៍សហគមន៍ថ្ងៃ២៨វិច្ឆិកា។ កាលពីថ្ងៃទី២៩វិច្ឆិកាម្សិលមិញ ក្រសួងសុខាភិបាល បានធ្វើតេស្តអ្នកប៉ះពាល់ បានចំនួន ៣៣៣២នាក់ ( នៅភ្នំពេញ និងខេត្តចំនួន ៧ ) តែការវិភាគអាចធ្វើបានតែ ២២៨៨សំណាក់ ( គិតត្រឹមម៉ោង ១:៣០ នាទីព្រឹកថ្ងៃទី៣០ ខែវិច្ឆិកា ឆ្នាំ២០២០ )។
ក្រសួងសុខាភិបាល បានប្រកាសថា អ្នកប៉ះពាល់ក្នុងព្រឹត្តិការណ៍សហគមន៍ ២៨វិច្ឆិកា មានអ្នកឆ្លងជំងឺកូវីដ១៩ សរុបចំនួន ១៤នាក់ ( ដោយគិតទាំងអ្នក ដែលបានរាយការណ៍ ចំនួន ៦នាក់ នៅថ្ងៃទី២៨ ខែវិច្ឆិកា ឆ្នាំ២០២០ និងអ្នករកឃើញថ្មី ចំនួន ៨នាក់ នៅថ្ងៃទី២៩ ខែវិច្ឆិកា ឆ្នាំ២០២០ )។
ព្រឹត្តិការណ៍សហគមន៍២៨វិច្ឆិកា សំដៅលើករណ៍ក្រុមគ្រួសារអគ្គនាយកពន្ធនាគារ ឆ្លងជំងឺកូវីដ១៩ ដែលដំបូងភរិយារបស់ឯកឧត្តមអគ្គនាយកពន្ធនាគារ ត្រូវបានរកឃើញឆ្លងជំងឺកូវីដ១៩ មុនគេ កាលពីថ្ងៃទី២៨ ខែវិច្ឆិកា ឆ្នាំ២០២០៕
