(សហរដ្ឋអាមេរិក)៖ ប្រធានាធិបតីជាប់ឆ្នោតអាមេរិកលោក Joe Biden នឹងតែងតាំងមន្ត្រីជាន់ខ្ពស់ក្នុងក្រុមការងារទំនាក់ទំនង ប្រចាំសេតវិមាន ជាស្ត្រីទាំងអស់ ហើយក្រុមការងារនេះនឹងស្ថិតនៅក្រោម ការដឹកនាំរបស់លោកស្រី Kate Bedingfield។ នេះបើយោងតាមការចុះផ្សាយរបស់សារព័ត៌មាន CNA នៅថ្ងៃទី៣០ ខែវិច្ឆិកា ឆ្នាំ២០២០។

លោកស្រី Kate Bedingfield នឹងបម្រើការងារជានាយកផ្នែកទំនាក់ទំនងនៃសេតវិមាន និងលោកស្រី Jen Psaki អ្នកនាំពាក្យមកពីបក្សប្រជាធិបតេយ្យ នឹងក្លាយជាលេខាធិការសារព័ត៌មាន។ លោក Biden ក៏មានគម្រោងតែងតាំងនាយកប្រតិបត្តិ វិទ្យាស្ថានសិក្សាស្រាវជ្រាវ CAP លោកស្រី Neera Tanden ជានាយកគ្រប់គ្រងការិយាល័យ និងកញ្ចប់ថវិកាផងដែរ។ អ្នកទាំង៣ ត្រូវបានគេស្គាល់ថាជាមន្ត្រីដែលធ្លាប់បម្រើការងារឲ្យរដ្ឋបាលអតីតប្រធានាធិបតីលោក Obama៕