(ភ្នំពេញ)៖ នៅម៉ោង ៨ព្រឹក ថ្ងៃទី២៥ ខែវិច្ឆិកា ឆ្នាំ២០២០ រដ្ឋសភា នឹងបន្តសម័យប្រជុំរដ្ឋសភា លើកទី៥ នីតិកាលទី៦ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាពញាចក្រី ហេង សំរិន ប្រធានរដ្ឋសភា។ ក្នុងចំណោមរបៀបវារៈទាំង ៧ ដែលរដ្ឋសភា នឹងប្រជុំ ពិភាក្សា និងអនុម័ត នៅព្រឹកថ្ងៃទី២៥វិច្ឆិកា គឺរបៀបវារៈទី១ កិច្ចប្រជុំពេញអង្គរដ្ឋសភា នឹងពិភាក្សា និងអនុម័តសេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២១ ឬថវិកាជាតិ ឆ្នាំ២០២១។
សេចក្តីព្រាងច្បាប់ ស្តីពី ហិរញ្ញវត្ថុ សម្រាប់ការគ្រប់គ្រងឆ្នាំ២០២១ ឬថវិកាជាតិ ឆ្នាំ២០២១ រាជរដ្ឋាភិបាល គ្រោងប្រើប្រាស់ថវិកាជាតិប្រមាណ ៧៥០០លានដុល្លារអាមេរិក។ ថវិកានេះ ថយចុះជាងឆ្នាំ២០២០ ចំនួន ១,៩ភាគរយ។
ថវិកាជាតិ ឆ្នាំ២០២១ ខាងមុខនេះ ថាថវិកាយុទ្ធសាស្ត្រការពារអាយុជីវិតប្រជាជន រក្សាលំនឹងសង្គម សេដ្ឋកិច្ច និងជីវភាពប្រជាពលរដ្ឋ ព្រមទាំងបាញ់ឆ្ពោះទៅរកការស្ដារឡើងវិញ ក្រោយពីវិបត្តិជំងឺកូវីដ១៩។
កិច្ចប្រជុំរដ្ឋសភា នៅព្រឹកថ្ងៃទី២៥ ខែវិច្ឆិកា ឆ្នាំ២០២០ ក៏មានរបៀបវារៈ ៦ផ្សេងទៀត រួមមាន៖ សេចក្តីព្រាងច្បាប់ ស្តីពី ការទូទាត់ថវិកាទូទៅរបស់រដ្ឋ សម្រាប់ការគ្រប់គ្រង ឆ្នាំ២០១៩។ សេចក្ដីព្រាងច្បាប់ ស្តីពី មូលបត្ររដ្ឋ។ សេចក្តីព្រាងច្បាប់ ស្តីពី ការរៀបចំ និងការប្រព្រឹត្តទៅ នៃអាជ្ញាធរសេវាហិរញ្ញវត្ថុ មិនមែនធនាគារ។ សេចក្តីព្រាងច្បាប់ ស្តីពី ការអនុម័តយល់ព្រមលើកិច្ចព្រមព្រៀងអាស៊ាន ស្តីពី ការទទួលស្គាល់ទៅវិញទៅមក លើការផ្តល់អាជ្ញាបណ្ណក្រុមអាកាសយានិក។ ការអនុម័តយល់ព្រមលើពិធីសារទី៣ ស្តីពី សិទ្ធិសហការលើជើហោះហើរ ក្នុងស្រុកក្នុងរង្វង់ទឹកដីនៃប្រទេសជាសមាជិកអាស៊ានណាមួយ ព្រមទាំងពិធីសារទី៤ ស្តីពីសិទ្ធិហោះហើរកូធ័រមីណលរវាងអាកាសយានដ្ឋាននៅក្នុងទឹកដីនៃប្រទេស ជាសមាជិកអាស៊ាន និងសេចក្តីព្រាងច្បាប់ ស្តីពីការអនុម័តយល់ព្រមលើពិធីសារអនុវត្តកញ្ចប់កិច្ចសន្យាទី៩ និងទី១០ នៃសេវាកម្មដឹកជញ្ជូនតាមផ្លូវអាកាស ក្រោមកិច្ចព្រមព្រៀងក្របខ័ណ្ឌអាស៊ាន ស្តីពី សេវាកម្ម៕
