(ភ្នំពេញ)៖ ក្រសួងសុខាភិបាល បានប្រកាសនៅព្រឹកថ្ងៃទី១០ ខែវិច្ឆិកានេះថា នៅថ្ងៃទី០៩ ខែវិច្ឆិកា ឆ្នាំ២០២០ ការធ្វើតេស្តអ្នកប៉ះពាល់ក្នុងព្រឹត្តិការណ៍ ០៣វិច្ឆិកា មានចំនួនសរុប ១១៦៦នាក់ ( ទាំងតេស្តលើកទី១ និងលើកទី២ ) ដែលទទួលបានលទ្ធផលពីវិទ្យាស្ថានប៉ាស្ទ័រកម្ពុជា ចំនួន ១១៤៣នាក់ មានដូចតទៅ៖ អ្នកវិជ្ជមានវីរុសកូវីដ១៩ មានចំនួន ៣នាក់ ( ១-ឯកឧត្តម សួស យ៉ារ៉ា ២-លោក ស ចិត្រា និង៣-ឯកអគ្គរដ្ឋទូតហុងគ្រី ប្រចាំកម្ពុជា និងវៀតណាម ) កំពុងសម្រាកព្យាបាល នៅក្នុងមន្ទីរពេទ្យមិត្តភាពខ្មែរ-សូវៀត ដែលក្រសួង បានចេញសេចក្តីប្រកាសព័ត៌មានរួចហើយ កាលពីល្ងាចថ្ងៃទី០៩ ខែវិច្ឆិកា ឆ្នាំ២០២០។ អ្នកអវិជ្ជមាន មានចំនួន ១១៤០នាក់។ នៅសល់វត្ថុសំណាក ចំនួន ២៣នាក់ទៀត ដែលនឹងត្រូវវិភាគបន្ត ដោយវិទ្យាស្ថានប៉ាស្ទ័រកម្ពុជា នៅថ្ងៃទី១០ ខែវិច្ឆិកា ឆ្នាំ២០២០។
ក្រសួងសុខាភិបាល បានប្រកាសថា បើគិតទាំងបុរសជាអង្គរក្សផ្ទាល់គណៈប្រតិភូហុងគ្រី ដែលរកឃើញថា វិជ្ជមានវីរុសកូវីដ១៩ នៅថ្ងៃទី០៧ ខែវិច្ឆិកា ឆ្នាំ២០២០ ចំនួនសរុបអ្នកវិជ្ជមានវីរុសកូវីដ១៩ នៅក្នុងព្រឹត្តិការណ៍ ០៣វិច្ឆិកា គឺមាន ០៤នាក់។
ក្នុងសេចក្តីប្រកាស ប្រចាំថ្ងៃ ក្រសួងសុខាភិបាល ក៏បានក្រើនរម្លឹកជូនដល់អ្នកដែលប៉ះពាល់ក្នុងព្រឹត្តិការណ៍ ០៣វិច្ឆិកា ទាំងអស់ ដែលាមនលទ្ធផលតេស្តលើកទី១ និងលើកទី២ អវិជ្ជមានវីរុសកូវីដ១៩ ចាំបាច់ត្រូវបន្តធ្វើចត្តាឡីស័ក ចំនួន ១៤ថ្ងៃ នៅតាមផ្ទះឲ្យបានត្រឹមត្រូវ និងនៅសណ្ឋាគារ រ៉េស៊ីដង់ សុខា ភ្នំពេញ ( សម្រាប់អ្នកដែលពុំមានលទ្ធភាពធ្វើចត្តាឡីស័ក នៅផ្ទះខ្លួនឯង ) ទៅតាមការណែនាំដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី ហ៊ុន សែន និងរបស់ក្រសួងសុខាភិបាល ឲ្យបានហ្មត់ចត់ជាទីបំផុត ហើយកុំដើរចេញក្រៅផ្ទះ ឬពីសណ្ឋាគារ ក្នុងអំឡុងពេលធ្វើចត្តាឡីស័កនេះឲ្យសោះ ដើម្បីទប់ស្កាត់ការចម្លងវីរុសដ៏កាចសាហាវនេះ ពីម្នាក់ ទៅម្នាក់ និងចូលក្នុងសហគមន៍។
ក្រសួងសុខាភិបាល ក៏បានបញ្ជាក់ថា គិតត្រឹមម៉ោង ៧ព្រឹក ថ្ងៃទី១០ ខែវិច្ឆិកា ឆ្នាំ២០២០ នៅទូទាំងប្រទេស រកឃើញអ្នកមានវីរុសកូវីដ១៩ សរុបចំនួន ៣០០នាក់ ( ស្ត្រី ៦០នាក់ និងបុរស ២៤០នាក់ )។ ក្នុងនោះ អ្នកព្យាបាលជាសះស្បើយ មានចំនួន ២៨៨នាក់ និង ១២នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ( ស្ត្រី ២នាក់ និងបុរស ១០នាក់ )៕
