(ភ្នំពេញ)៖ ឯកឧត្តម នាយឧត្តមសេនីយ៍ បណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល កាលពីថ្ងៃទី២៧ ខែតុលា ឆ្នាំ២០២០ បានអនុញ្ញាតឱ្យតំណាងក្រុមហ៊ុនអន្តរជាតិចិនអេវីក AVIC INTERNATIONAL HOLDING CORPORATION ដែលដឹកនាំដោយ Mr.Ted Chen អ្នកចាត់ការទូទៅក្រុមហ៊ុន និងសហការី ចូលជួបសំដែងការគួរសម និងពិភាក្សាការងារ។

ឯកឧត្តម នាយឧត្តមសេនីយ៍ បណ្ឌិតរដ្ឋមន្ត្រី បានស្វាគមន៍ចំពោះចំពោះក្រុមហ៊ុននិងបានលើកឡើងនូវចំណងមិត្តភាព ដែលមានលក្ខណៈគ្រប់ជ្រុងជ្រោយ រឹងដូចដែកថែប រវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន។

Mr. Ted Chen អ្នកចាត់ការទូទៅក្រុមហ៊ុនអន្តរជាតិចិនអេវីក AVIC INTERNATIONAL HOLDING CORPORATION បានជម្រាបជូន ឯកឧត្តម បណ្ឌិត រដ្ឋមន្ត្រី ពីគោលបំណងរបស់ក្រុមហ៊ុន៖

១. ស្វែងយល់ពីលទ្ធភាពនៃកិច្ចសហប្រតិបត្តិការរវាងក្រុមហ៊ុន ជាមួយរដ្ឋលេខាធិការដ្ឋានអាកាសចរស៊ីវិល

២. ពិនិត្យលទ្ធភាព និងសក្តានុពលដែលអាចឱ្យក្រុមហ៊ុនធ្វើការវិនិយោគ ឬធ្វើជាដៃគូរអភិវឌ្ឍន៍លើវិស័យអាកាសចរស៊ីវិល

៣. កិច្ចពាក់ព័ន្ធនឹងការបណ្តុះបណ្តាលធនធានមនុស្សតាមលទ្ធភាពដែលក្រុមហ៊ុនអាចជួយបាន

ឯកឧត្តម បណ្ឌិត រដ្ឋមន្ត្រី ស្វាគមន៍ចំពោះសំណើរបស់ក្រុមហ៊ុនក្នុងកិច្ចសហប្រតិបត្តិការ ជំរុញឱ្យមានការវិនិយោគលើវិស័យអាកាសចរស៊ីវិលទៅតាមលទ្ធភាពដែលក្រុមហ៊ុនអាចធ្វើបាន និងស្នើដល់ក្រុមហ៊ុនពិនិត្យលទ្ធភាពផ្តល់ជំនួយបច្ចេកទេសសម្រាប់ការបណ្តុះបណ្តាលធនធានមនុស្សលើវិស័យអាកាសចរស៊ីវិល។

ជាមួយគ្នានេះ តំណាងក្រុមហ៊ុនក៏បានទទួលយកសំណើរបស់ឯកឧត្តមបណ្ឌិតរដ្ឋមន្ត្រី ទៅសិក្សា និងពិនិត្យលទ្ធភាពតាមផ្លូវច្បាប់ដែលក្រុមហ៊ុនមានលទ្ធភាពអាចទទួលយកបាន៕