(ភ្នំពេញ)៖ «គ្មានប្រទេសជាតិណាមួយអាចគេចផុតពីវិបត្តិនៃការប្រែប្រួលអាកាសធាតុបានឡើយ។ ប៉ុន្តែ មានតែប្រជាជនក្រីក្រ និងងាយរងគ្រោះបំផុតប៉ុណ្ណោះ ដែលជាអ្នកចូលរួមតិចតួចបំផុតក្នុងការបង្កនូវវិបត្តិនេះ បែរជារងផលប៉ះពាល់ខ្លាំងជាងគេ។» នេះជាប្រសាសន៍របស់ លោក António Guterres, United Nations Secretary-General ស្រង់ដោយអង្គការសហប្រជាតិប្រចាំប្រទេសកម្ពុជា (UNDP Cambodia) ផ្សព្វផ្សាយនៅថ្ងៃទី១៩ ខែតុលានេះ។

សូមបញ្ជាក់ថា ទឹកជំនន់កំពុងតែបង្កផលប៉ះពាល់ដល់ការរស់នៅរបស់ប្រជាជនតាមបណ្ដារខេត្តជាច្រើន​ និងរាជធានីភ្នំពេញ នៅប្រទេសកម្ពុជា។ របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា ផលប៉ះពាល់ខូចខាតដោយជំន់ទឹកភ្លៀង (គិតចាប់ពីថ្ងៃទី១ ខែកញ្ញា ដល់ថ្ងៃទី១៩ ខែតុលា ឆ្នាំ២០២០) ប៉ះពាល់១៩រាជធានី ខេត្ត ស្មើ ៩១ក្រុងស្រុកខណ្ឌ និងប្រជាជនជាង ៧ម៉ឺនគ្រួសារ ស្មើនឹងជាង៣១ម៉ឺនាក់ និងស្លាប់ចំនួន ២៥នាក់៕