(ភ្នំពេញ)៖ ក្នុងសារជូនជនរួមជាតិ ដោយផ្សាយផ្ទាល់តាមទូរទស្សន៍ជាតិ និងតាមប្រព័ន្ធឃោសនាមហាជន ហ្វេសប៊ុកជាច្រើន សម្តេចតេជោ ហ៊ុន សែន បានលើកឡើងថា ក្នុងពេលគ្រោះទឹកជំនន់ បង្កដោយទឹកភ្លៀង នាពេលនេះ យើងមិនអាចឲ្យមានអ្នកស្លាប់ដោយលង់ទឹក និងដាច់បាយ ដែលយើងមិនបានជួយសង្គ្រោះនោះទេ។
សម្តេចតេជោ ហ៊ុន សែន បានប្រកាសដូច្នេះ ក្នុងពេលសម្តេច អញ្ជើញជួបសួរសុខទុក្ខប្រជាពលរដ្ឋរងគ្រោះដោយជំនន់ទឹកភ្លៀង ដែលកំពុងស្នាក់នៅទួលសុវត្ថិភាព ក្នុងបុរីពិភពថ្មី នៅជិតរង្វង់មូលគួស្រូវ ក្នុងខណ្ឌដង្កោ រាជធានីភ្នំពេញ នាយប់ថ្ងៃទី១៥ ខែតុលា ឆ្នាំ២០២០។
សម្តេចតេជោ ហ៊ុន សែន បានលើកឡើងថា «នេះជាពេលវេលាដ៏លំបាក ហើយអ្នកដែលលំបាកជាងទៀត ក្រៅតែពីប្រជាពលរដ្ឋ ដែលលំបាក នាយករដ្ឋមន្ត្រីប្រហែលជាលំបាកទៅលើការគិត ព្រោះគ្រួសារមួយលំបាក ក៏ប៉ុន្តែខ្ញុំត្រូវទទួលខុសត្រូវចំពោះប្រជាជន ១៦លាននាក់ ហើយកំពុងតែខិតខំកម្រិតធ្វើយ៉ាងណា កុំឲ្យប្រជាជនស្លាប់ ដោយការលង់ទឹក! កុំឲ្យប្រជាជនណាម្នាក់ ដាច់បាយ ដោយយើងមិនបានដឹង ហើយមិនបានជួយសង្គ្រោះ»៕
