(ភ្នំពេញ)៖ នៅពេលអញ្ជើញជួបសួរសុខទុក្ខបងប្អូនប្រជាពលរដ្ឋរងគ្រោះដោយទឹកជំនន់ ទឹកភ្លៀង ដែលកំពុងស្នាក់នៅទួលសុវត្ថិភាព ក្នុងខណ្ឌដង្កោ រាជធានីភ្នំពេញ នាព្រលប់ថ្ងៃទី១៥ ខែតុលា ឆ្នាំ២០២០ សម្តេចតេជោ ហ៊ុន សែន បានថ្លែងសារទៅកាន់ជនរួមជាតិ ពាក់ព័ន្ធគ្រោះទឹកជំនន់។ សម្តេចតេជោ ហ៊ុន សែន បានប្រកាសណែនាំអាជ្ញាធរសមត្ថកិច្ច ត្រូវផ្តល់អាទិភាព ដល់ការជម្លៀសប្រជាពលរដ្ឋ ចេញពីតំបន់គ្រោះថ្នាក់។
សម្តេចតេជោ ហ៊ុន សែន បានប្រកាសថា ឥឡូវនេះ នៅភ្នំពេញ ខេត្តកណ្តាល និងខេត្តបន្ទាយមានជ័យ កំពុងរងគ្រោះធ្ងន់ធ្ងរជាងគេ។ ដូច្នេះសូមស្នើឲ្យអាជ្ញាធរ នៅភ្នំពេញ ខេត្តកណ្តាល និងខេត្តបន្ទាយមានជ័យ ព្រមទាំងទីកន្លែងផ្សេងទៀត ដែលលិចទឹក សូមបន្តយកចិត្តទុកដាក់ តាមដានដំណើរវិវត្តនៃចរន្តទឹក ដែលហូរចូល។
សម្តេចតេជោ បន្តថា ២ម៉ោងមុន សម្តេចទទួលរបាយការណ៍ពីអភិបាលខេត្តកំពង់ស្ពឺ ឯកឧត្តម វ៉ី សំណាង ថាទឹកនៅផ្នែកខាងលើ បានស្រក់ចុះបន្តិច។ ដូច្នេះបើនៅខាងលើទឹកស្រក់ នោះនៅភ្នំពេញនេះ នឹងស្រក់បន្តិច។ តែឥឡូវ កំពុងភ្លៀង។
សម្តេចតេជោ ហ៊ុន សែន បន្ថែមថា «ការខូចខាត យើងមិនទាន់បូកសរុបទេ។ តែអាជ្ញាធរសមត្ថកិច្ច ត្រូវជួយសង្គ្រោះប្រជាពលរដ្ឋ ចេញពីតំបន់គ្រោះថ្នាក់សិន»។
សម្តេចតេជោ ហ៊ុន សែន ក៏បានបន្តថា «ឥឡូវ មានតែ ១០ខេត្តទេ ដែលខ្ញុំបានផ្តល់ថវិកាសង្គ្រោះ។ តែតាមការព្យាករ ថា នឹងមានភ្លៀងធ្លាក់នៅទូទាំងប្រទេស។ ដូច្នេះ យើងត្រូវផ្តល់អាទិភាព ដល់ការជម្លៀសប្រជាពលរដ្ឋ ចេញពីតំបន់គ្រោះថ្នាក់។ សូមប្រជាពលរដ្ឋ នៅពេលអាជ្ញាធរ ស្នើសុំឲ្យចាកចេញពីផ្ទះ ដែលលិចទឹក សូមចេញពីផ្ទះលិចទឹកនោះ។ កុំគិតថា មិនអីទេ!»។
សូមរម្លឹកថា ទោះបីជាភ្លៀងធ្លាក់ខ្លាំងយ៉ាងណាក៏ដោយ តែនៅម៉ោងជិត ៧យប់ ថ្ងៃទី១៥ ខែតុលា ឆ្នាំ២០២០ សម្តេចតេជោ នាយករដ្ឋមន្ត្រី ហ៊ុន សែន បានអញ្ជើញជួបសំណេះសំណាល សួរសុខទុក្ខបងប្អូនប្រជាពលរដ្ឋ ដែលរងគ្រោះដោយទឹកជំនន់ កំពុងស្នាក់នៅទួលសុវត្ថិភាព នៅក្នុងបុរីពិភពថ្មី ២ នៅជិតរង្វង់មូលគួស្រូវ ក្នុងខណ្ឌដង្កោ រាជធានីភ្នំពេញ។
សូមរម្លឹកថា ជំនន់ស្ទឹងព្រែកត្នោត នៅរាជធានីភ្នំពេញ បង្កការលិចលង់នៅសង្កាត់ ចំនួន ៥ ក្នុងខណ្ឌដង្កោ នាពេលនេះ រួមមាន៖ សង្កាត់ទៀន សង្កាត់សាក់សំពៅ សង្កាត់ព្រែកកំពឹស សង្កាត់ស្ពានថ្ម និងសង្កាត់គងនយ។
ចាប់តាំងពីយប់ថ្ងៃទី១៤តុលា កំណាត់ផ្លូវលេខ២១៧ ចាប់ពីភ្លើងស្តុបចំការដូង ទៅរង្វង់មូលគួស្រូវ ត្រូវបានទឹកលិច មិនអាចធ្វើចរាចរណ៍បានទេ។ ក្នុងនោះ ប្រជាពលរដ្ឋរាប់រយគ្រួសារ ត្រូវបានអាជ្ញាធរជម្លៀសចេញពីផ្ទះលិចទឹក ទៅទូលសុវត្ថិភាព៕
