(ភ្នំពេញ)៖ ក្រុមហ៊ុន ជីប ម៉ុង គ្រុប បានចូលរួមបរិច្ចាគថវិកា ៣០ម៉ឺនដុល្លារអាមេរិក ជូនសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា សម្រាប់ជួយសង្រ្គោះប្រជាពលរដ្ឋ ដែលរងគ្រោះដោយគ្រោះទឹកជំនន់។
ក្នុងសារលិខិតថ្លែងអំណរគុណ ជូនសប្បុរសជន ចុះថ្ងៃទី១៣ ខែតុលានេះ សម្តេចតេជោ ហ៊ុន សែន លើកឡើងថា «ខ្ញុំតែងតែមានមោទនភាពយ៉ាងជ្រាលជ្រៅ ដោយសារគុណធម៌ដ៏ថ្លៃថ្លារបស់ជនរួមជាតិយើង ដែលជានិច្ចកាល តែងតែបង្ហាញនូវសប្បុរសធម៌ និងសាមគ្គីធម៌ ជួយគ្នាទៅវិញទៅមក នៅក្នុងគ្រា មានអាសន្ន»។
សម្តេចតេជោ ហ៊ុន សែន បន្ថែមថា ក្នុងនាមរាជរដ្ឋាភិបាល និងប្រជាជនកម្ពុជា សម្តេចសូមថ្លែងអំណរគុណយ៉ាងស្មោះ ចំពោះជំនួយជាថវិកា ដែលលោកឧកញ៉ា លោកជំទាវឧកញ៉ា និងឯកឧត្តមឧកញ៉ា បានផ្តល់ជាកិច្ចជួយសំរាលដល់ការដោះស្រាយផលវិបាក ដោយសារទឹកជំនន់ ដែលកើតចេញមកពីគ្រោះធម្មជាតិ នាពេលបច្ចុប្បន្ននេះ។
សូមរម្លឹកថា នៅថ្ងៃទី១៣ ខែតុលានេះ យ៉ាងហោចណាស់ មានឧកញ៉ា ៤រូប បានផ្តល់ជំនួយ ជាថវិការាប់សែនដុល្លារអាមេរិក ជូនសម្តេចតេជោ នាយករដ្ឋមន្ត្រី ហ៊ុន សែន ដើម្បីរួមចំណែក ក្នុងប្រតិបត្តិការសង្គ្រោះប្រជាជន ដែលរងគ្រោះដោយបាតុភូតធម្មជាតិ គ្រោះទឹកជំនន់។
ជំនួយពីសប្បុរសជន នាពេលនេះ រួមមាន៖ លោកឧកញ៉ា ឌួង ឆាយ និងលោកជំទាវ ដេត ម៉ារីណា បានរួមចំណែក ១០ម៉ឺនដុល្លារ។ រីឯលោកជំទាវឧកញ៉ា ង៉ូវ ម៉ិច និងឯកឧត្តមឧកញ៉ា ង៉ូវ ស្រ៊ុន បានរួមចំណែកក្នុងប្រតិបត្តិការសង្គ្រោះប្រជាជន ដែលរងគ្រោះដោយបាតុភូតធម្មជាតិគ្រោះទឹកជំនន់ ចំនួន ១០ម៉ឺនដុល្លារ។ ដោយឡែក ក្រុមហ៊ុន ជីប ម៉ុង បានចូលរួមបរិច្ចាគថវិកាចំនួន ៣០ម៉ឺនដុល្លារអាមេរិក៕
