(ភ្នំពេញ)៖ ក្រសួងសុខាភិបាល បានប្រកាសថា អ្នកពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា បានឆ្លងជំងឺកូវីដ១៩ ចំនួន ៤នាក់ទៀត។ អ្នកឆ្លងថ្មីទាំង ៤នាក់ គឺជាអ្នកធ្លាប់ទៅហាង Zando នៅបឹងកេងកង អ្នកទៅហាង Pedro និងបុគ្គលិកហាង Pedro ២នាក់ទៀត។
សេចក្តីប្រកាសរបស់ក្រសួងសុខាភិបាល នៅព្រឹកថ្ងៃទី៩ ខែធ្នូ បង្ហាញថា អ្នកឆ្លងជំងឺកូវីដថ្មី ទាំង ៤នាក់ រួមមាន៖ ១.បុរសជនជាតិខ្មែរ ឈ្មោះ អិត កុម៉ាល អាយុ ៣៥ឆ្នាំ មានអាសយដ្ឋាន ស្នាក់នៅសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ បានទៅហាង Zando បឹងកេងកង នៅថ្ងៃទី២៧ ខែវិច្ឆិកា ឆ្នាំ២០២០។ ២.បុរសជនជាតិខ្មែរ ឈ្មោះ សន សាន់បញ្ញារិទ្ធ អាយុ ២០ឆ្នាំ មានអាសយដ្ឋាន ស្នាក់នៅភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល ជាបុគ្គលិកហាង Pedro ផ្លូវព្រះសីហនុ។ លទ្ធផលធ្វើតេស្តវត្ថុសំណាករបស់បុរសខាងលើនេះ ផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ គឺវិជ្ជមានវីរុសកូវីដ១៩។ ៣. ស្ត្រីជនជាតិខ្មែរ ឈ្មោះ ឡុង សុខនី អាយុ ៣៣ឆ្នាំ មានអាសយដ្ឋាន ស្នាក់នៅសង្កាត់ព្រែកឫស្សី ក្រុងតាខ្មៅ ខេត្តកណ្តាល ជាបុគ្គលិកហាង Pedro ផ្លូវព្រះសីហនុ និង៤.បុរសជនជាតិខ្មែរ ឆ្មោះ ទៅ គឹមហុក អាយុ ២៧ឆ្នាំ មានអាសយដ្ឋាន ស្នាក់នៅសង្កាត់បឹងទំពុន ខណ្ឌមានជ័យ រាជធានីភ្នំពេញ បានចូលទៅហាង Pedro ដែលជាអ្នកប៉ះពាល់ជាមួយអ្នកមានជំងឺ ឈ្មោះ ញិល សុខកូឡា ដែលត្រូវបានរកឃើញមានវីរុសកូវីដ១៩ នៅថ្ងៃទី០៣ ខែធ្នូ ឆ្នាំ២០២០ ហើយកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ក្រោយរកឃើញ ឆ្លងជំងឺកូវីដ១៩ អ្នកទាំង ៤ ត្រូវបានក្រសួងសុខាភិបាល បញ្ជូនទៅសម្រាកព្យាបាល នៅមណ្ឌលសុខភាពចាក់អង្រែ រាជធានីភ្នំពេញ ៣នាក់ និងម្នាក់ នៅមន្ទីរពេទ្យមិត្តភាពខ្មែរ-សូវៀត។
ក្រសួងសុខាភិបាល បានប្រកាសថា កាលពីថ្ងៃទី៨ ខែធ្នូ វត្ថុសំណាក ដែលនៅសល់ពីថ្ងៃទី០៧ ខែធ្នូ មានចំនួន ១៦០៥សំណាក បូកបន្ថែមចំនួនវត្ថុសំណាក ទទួលបានបន្ថែម មកពីខេត្ត និងរាជធានីភ្នំពេញ ដែលជាថ្ងៃធ្វើតេស្ត លើកទី២ សម្រាប់ព្រឹត្តិការណ៍សហគមន៍២៨វិច្ឆិកា សរុបមានចំនួន ៣៤៦៧សំណាក ត្រូវបានធ្វើវិភាគដោយវិទ្យាស្ថានប៉ាស្ទ័រកម្ពុជា គឺមានលទ្ធផលវិជ្ជមានវីរុសកូវីដ១៩ថ្មី ចំនួន ៤នាក់ ( ដែលជាអ្នកជំងឺខាងលើនេះ )។ ដោយឡែក មាននៅសល់វត្ថុសំណាក ចំនួន ៤៩៩៤សំណាកផ្សេងទៀត ដែលត្រូវវិភាគបន្តនៅថ្ងៃទី៩ ខែធ្នូនេះ។
សូមរម្លឹកថា ព្រឹត្តិការណ៍សហគមន៍២៨វិច្ឆិកា មកដល់ព្រឹកថ្ងៃទី៩ ខែធ្នូ ឆ្នាំ២០២០ រកឃើញអ្នកឆ្លងជំងឺកូវីដ១៩ សរុបចំនួន ៣៨នាក់ហើយ។ រីឯអ្នកធ្វើតេស្តសរុបមានជាង ១១០០០នាក់។
ក្រសួងសុខាភិបាល ក៏បានប្រកាសថា គិតត្រឹមម៉ោង ៧ព្រឹក ថ្ងៃទី៩ ខែធ្នូ ឆ្នាំ២០២០ ស្ថានភាពជំងឺកូវីដ១៩ នៅកម្ពុជា រកឃើញអ្នកឆ្លងសរុបចំនួន ៣៥៤នាក់។ ក្នុងណោះ ៣០៧នាក់ ត្រូវបានព្យាបាលជាសះស្បើយ និង ៤៧នាក់ កំពុងសម្រាកព្យាបាលនៅមន្ទីរពេទ្យ ( ៣៤នាក់ នៅមន្ទីរពេទ្យមិត្តភាពខ្មែរ-សូវៀត និង ១៣នាក់ នៅមណ្ឌលសុខភាពចាក់អង្រែ ក្នុងរាជធានីភ្នំពេញ )៕
